Rasman. Shavkat Rahmonov chempionlik jangidan mahrum bo‘ldi

Yarim o‘rta vazn toifasida chempionlikka asosiy da’vogar qozog‘istonlik Shavkat Rahmonov jarohat oldi va Bilol Muhammad bilan jangda qatnasha olmasligi ma’lum bo‘ldi. Bu haqda “MMA Orbit” nashri xabar berdi.

Manbaga ko‘ra, 10 may kuni bo‘lib o‘tadigan UFC 315 turniri markaziy jangida yarim o‘rta vazn toifasi chempioni Falastin sharafini himoya qilayotgan Bilol Muhammad va Shavkat Rahmonov oktagonga chiqishi lozim edi. Ammo qozog‘istonlik jangchi jarohat oldi va turnirni tark etdi.

Ma’lum bo‘lishicha, promoushen rahbarlari Rahmonovning o‘rniga Bilolga raqib qilib avstraliyalik Jek Della Madallenani berdi. Turnir vaqti o‘zgarmadi, 10 may kuni o‘tkaziladi.

Ma’lumot o‘rnida, Shavkat Rahmonov professional karerasida 19 ta jang o‘tkazgan va barchasida g‘alaba qozongan. So‘nggi bor u 2024 yilning 7 dekabrida irlandiyalik Ian Garriga qarshi okatgonga ko‘tarilgan va ochkolar hisobiga ko‘ra g‘alaba qozongan.

Madallena esa faoliyati davomida 19 ta jang o‘tkazib, 17 g‘alaba va 2 mag‘lubiyat qayd etigan. Oxirgi jangini u 2024 yilning 9 may kuni o‘tkazgan va o‘shanda braziliyalik Gilbert Bernsni nokautga uchratgandi.