Ramzan Qodirovning yana bir qizi taqdirlandi

Checheniston rahbari Ramzan Qodirovning 20 yoshli qizi Xutmat bobosi Axmat Qodirov sharafiga ta’sis etilgan respublikaning oliy mukofoti – Qodirov ordeni bilan taqdirlandi. Bu haqda Chechenistonning Milliy siyosat, tashqi aloqalar, matbuot va axborot bo‘yicha vaziri Ahmad Dudayev o‘zining Telegram-kanalida ma’lum qildi.

Uning so‘zlariga ko‘ra, Xutmat Qodirova o‘ziga ishonib topshirilgan har qanday sohada “ajoyib natija” ko‘rsatmoqda.

“Shunday yoshligida u viloyat tibbiyoti rivojiga ulkan hissa qo‘shdi. Buning hammasi uning o‘z xalqi va mamlakatining vatanparvari bo‘lgani sababdir!”, degan vazir.

Ta’kidlash joizki, Xutmat Qodirova 2023 yil martida Checheniston sog‘liqni saqlash kuratori etib tayinlangan edi. Shuningdek, u respublika rahbari kotibiyati boshlig‘ining o‘rinbosari lavozimini ham egallaydi.

2021 yil oktyabr oyida Qodirovning yana bir qizi Ayshat Checheniston madaniyat vaziri bo‘lgan. O‘sha paytda u 22 yoshda edi. 2023 yil aprelida Qodirovning jiyani 26 yoshli Hamzat Qodirov uning kuchlar bloki bo‘yicha maslahatchisi yordamchisi bo‘ldi. Bundan biroz oldin u Mulk va yer munosabatlari vaziri, Respublika Bosh vaziri o‘rinbosari lavozimiga tayinlangan edi.

Ayrim nashrlarning ma’lumotlariga ko‘ra, Chechenistondagi 158 nafar yuqori martabali amaldorning 30 foizi Ramzan Qodirovning qarindoshlari, 23 foizi qishloqdoshlari, yana 12 foizi Checheniston rahbarining do‘stlari va ularning qarindoshlaridir. 

“Istalgan muassasa va har qanday lavozimdagi qarindoshlarimga qo‘yilgan talab o‘n baravar ko‘p, chunki ular men tufayli emas, balki o‘zlarining iqtidori ortidan ishlayotganini isbotlashi kerak. Men kimga ishonsam, o‘shani tayinlayman”, degan Ramzan Qodirov qarindoshlarining Checheniston hukumatiga tayinlanishiga izoh berar ekan.

Eslatib o‘tamiz, o‘tgan yilning noyabr oyida Ramzan Qodirovning ikkinchi qizi, Grozniy meriyasining maktabgacha ta’lim bo‘limi boshlig‘i Xadijat Qodirova ham Ahmad Qodirov nomidagi orden bilan taqdirlangandi. Dekabr oyida esa Qodirovning to‘ng‘ich qizi, Checheniston Madaniyat vaziri Ayshat Qodirova “Checheniston Respublikasida xizmat ko‘rsatgan madaniyat xodimi” unvoni, “Inson huquqlarini himoya qilgani uchun” medali bilan taqdirlandi.