Ramzan Qodirov “Vagner” Baxmutdan ketsa, chechen harbiylari shaharni egallashga tayyorligini aytdi

Checheniston rahbari Ramzan Qodirov “Vagner” xususiy harbiy kompaniya  rahbari Yevgeniy Prigojinning Baxmutdan o‘z bo‘linmalarini olib chiqib ketish haqidagi so‘zlaridan so‘ng Rossiya Mudofaa vaziri Sergey Shoyguga murojaat qilib, Checheniston maxsus kuchlari shaharni egallashiga va’da berdi. Bu haqda u o‘zining Telegram-kanalida e’lon qildi.

Qodirovning aytishicha, agar “Vagner” haqiqatdan ham hududni tark etsa, ularning o‘rniga Checheniston maxsus kuchlarining “Ahmad” harbiylari keladi. Checheniston rahbari uning askarlari allaqachon oldinga siljish va shaharni egallashga tayyor ekani, buning uchun ularga bir necha soat kerak bo‘lishini ta’kidlagan.

“Ammo men shaharning qolgan ikki kilometrini askarlarning hayoti evaziga emas, balki o‘zaro tushunish, qo‘llab-quvvatlash, qo‘mondonlik va jangchilarning Oliy Bosh qo‘mondonning buyrug‘ini bajarishdagi qat’iyati natijasida olishimizni istardim”, deb yozgan Qodirov.

Shu bilan birga, Ramzan Qodirov chechen bo‘linmalarida ham o‘q-dorilar bilan bog‘liq muammolar borligini tan olgan. Misol uchun, u Mudofaa vazirligi Mariupol yo‘nalishida faqat bitta tank chiqarganini, biroq o‘shanda “operatsiya”ni muvaffaqiyatli yakunlash uchun beshtasi kerak bo‘lganini aytgan. 
Bundan tashqari, u “Ahmad” maxsus kuchlari qo‘mondoni va LPR xalq militsiyasining 2-armiya korpusi qo‘mondoni o‘rinbosari Apti Alaudinov ham tez-tez o‘q-dorilar bilan bog‘liq muammolarga duch kelishini, ammo u hech qachon bu haqda Internet orqali oshkora e’lon qilmagani, aksincha faqat ichki aloqalar orqali muammoni hal qilganini ta’kidlagan.

"Umid qilamanki, Sergey Kujugetovich mening chaqiruvimni tinglaydi va Bosh shtabga bu yerga borib, ishlarni tartibga solish haqida buyruq beriladi. Bu vaziyatdan chiqishning yagona va askarcha to‘g‘ri yo‘li”, deya xulosa qilgan Qodirov.

Eslatib o‘tamiz, oldinroq Prigojin “Vagner” guruhi o‘ziga zarur bo‘lgan  snaryadlarning atiga 30 foizini aytib, uning qo‘shinlari Baxmutni tark etishini aytgan edi.