Ramzan Qodirov 20 yoshli qizini yangi lavozimga tayinladi

Checheniston yetakchisining 20 yoshli qizi, Qodirov kotibiyati rahbarining o‘rinbosari Xutmat Qodirova endilikda respublika sog‘liqni saqlash tizimini boshqaradigan bo‘ldi. Bu haqda Checheniston hukumati raisining o‘rinbosari Adam Alxanov o‘zining Telegram-kanalida xabar berdi.

“Checheniston Respublikasi rahbari topshirig‘iga ko‘ra, bundan buyon Checheniston Respublikasi sog‘liqni saqlash tizimi Xutmat Ramzanovna tomonidan nazorat qilinadi. Uning rahbarligidagi reabilitatsiya xizmati sifat jihatidan yangi bosqichga ko‘tarilganini ko‘ramiz. Endi Xutmat Qodirovaning bilim va tajribasi butun tibbiyot sohasini rivojlantirishga xizmat qiladi”, deb yozgan Alxanov.

Ta’kidlash joizki, Ramzan Qodirovning qizlari respublikadagi yuqori davlat lavozimlarini egallashi birinchi marta bo‘layotgani yo‘q. Masalan, uning to‘ng‘ich qizi Aishat Qodirova respublika Madaniyat vazirligini boshqaradi. Yana bir qizi Xadijat Qodirova esa Grozniy meriyasining maktabgacha ta’lim bo‘limi boshlig‘i sanaladi.

Checheniston rahbarining 17 yoshdagi o‘g‘li Ahmad Qodirov esa “Birinchilar harakati” Butunrossiya bolalar va o‘smirlar harakatining respublikadagi mintaqaviy bo‘limi kengashi raisi hisoblanadi.

Eslatib o‘tamiz, oldinroq Ramzan Qodirovning o‘g‘li Ahmad Qodirov uylangani, to‘yda 87 ta Bugatti va Rolls-Royce mashinalaridan iborat kortej xizmat qilgani aytilgandi.