Rahimova “US Open”da dunyoning birinchi raketkasiga qarshi kortga chiqdi

Kecha, 4 sentyabr kuni o‘zbekistonlik tennischi Kamilla Rahimova AQSH Ochiq chempionatining 1/16 finalida dunyoning birinchi raketkasi, musobaqaning amaldagi chempioni Arina Sobolenkoga qarshi kortga chiqdi. Rahimova ikki set davom etgan bahsda amaldagi chempionga imkoniyatni boy berdi.

90 daqiqa davom etgan bahsda belaruslik tennischi 6:3, 6:4 hisobida g‘alaba qozonib, 1/8 finalga yo‘l oldi.  Bahs davomida Sobolenko 10 ta, Rahimova esa 2 ta eys qayd etdi. Qo‘shxato bo‘yicha Kamilla 6 marta xato qilgan bo‘lsa, belaruslik tennischida bu ko‘rsatkich 1 tani tashkil etdi. Sobolenko 7 ta breyk-poyntdan 2 tasidan foydalangan, Rahimova esa raqibining servisini buzish imkoniga ega bo‘lmadi.

Shu tariqa, Sobolenko va Rahimova o‘rtasidagi o‘zaro uchrashuvlar soni 4 taga yetdi. Barcha bahslarda belaruslik tennischi g‘alaba qozongan.

Shu bilan Kamilla Rahimovaning “US Open-2026”dagi ishtiroki yakunlandi. Sobolenko esa 1/8 finalda amerikalik Teylor Taunsend bilan kuch sinashadi.