Putinning inauguratsiyasida Yevropa vakillari qatnashadimi?

Bugun, 7 may kuni Kremlda bo‘lib o‘tadigan Vladimir Putinning Rossiya Federatsiyasi Prezidenti lavozimiga kirishish marosimida o‘z vakillarining ishtirok etishi masalasida Yevropa Ittifoqi davlatlari turlicha fikrda. Fransiya, Vengriya va Slovakiya Rossiya tomonining “aloqa kanallarini ochiq saqlash” taklifini qabul qilmoqchi, ammo Yevropa Ittifoqining ko‘plab boshqa a’zolari, jumladan Germaniya ham Putinning inauguratsiya marosimida qatnashmaslikka qaror qildi. Bu haqda Dpa agentligi Bryusseldagi bir necha diplomatlarga tayanib xabar berdi.

"Germaniya bu tadbirda ishtirok etmaydi", deydi 6 may kuni Germaniya Tashqi ishlar vazirligi matbuot kotibi.

6 may oqshomida Vladimir Putinning beshinchi prezidentlik muddatiga inauguratsiyasiga taklifni qabul qilishdan bosh tortgani haqida Yevropa Ittifoqining Bryusseldagi tashqi siyosat xizmati ham xabar qildi.

Avvalroq Yevropa Ittifoqining Tashqi ishlar va xavfsizlik siyosati bo‘yicha oliy vakili Jozep Borrel YeI vakilining marosimda ishtirok etishiga qarshi chiqqan edi.

Biroq ba’zi diplomatlar bu fikrga qo‘shilmagan. Dpa agentligi hisobotiga ko‘ra, ularning dalillari shundan iboratki, bunday qadam Rossiyaga kelajakda diplomatik qoidalar va me’yorlarga yanada ko‘proq e’tibor bermaslik uchun asos beradi.

Yevropa Ittifoqiga a’zo bo‘lmagan Buyuk Britaniya ham 7 may kuni Kremlga o‘z vakilini yuborish niyatida emasligini ma’lum qildi.

“Birlashgan Qirollik ertaga bo‘lib o‘tishi kerak bo‘lgan Prezident Vladimir Putinning inauguratsiyasiga o‘z vakilini yubormaydi. Rossiyaning Ukrainaga hujumi suveren demokratik davlatga asossiz, qasddan va vahshiylarcha hujumdir”, deyiladi Britaniya Tashqi ishlar vazirligi xabarida.

Bugun, 7 may kuni 71 yoshli Vladimir Putin beshinchi marta Rossiya Federatsiyasi Prezidenti sifatida qasamyod qilishi kerak. Mart oyida bo‘lib o‘tgan saylovlarda Rossiya Federatsiyasi Markaziy saylov komissiyasi amaldagi davlat rahbarini qo‘llab-quvvatlovchi ovozlarning 87 foizini hisoblab chiqdi.

G‘arb Rossiya saylovlarini erkin va adolatsiz deb tanqid qilgan.