Putinning 9 maydagi sulh g‘oyasi manipulyatsiyadir – Zelenskiy

Ukraina Prezidenti Vladimir Zelenskiy Ukraina urushni tugatish uchun “barcha hamkorlar bilan ishlashga” tayyorligini, biroq Rossiya hamma narsani rad etib, “dunyoni manipulyatsiya qilib, AQSHni aldashga urinayotganini” aytdi. Bu haqda u kecha, 29 aprel kuni kechki murojaatida so‘z ochdi.

Zelenskiy Rossiya Prezidenti Vladimir Putinning Rossiyada Ikkinchi jahon urushida Germaniya ustidan qozonilgan g‘alabaning 80 yilligi nishonlanishi munosabati bilan Ukrainada 8 maydan 10 may yarim tungacha davom etishi kerak bo‘lgan uch kunlik “sulh” haqidagi bayonotlarini shunday izohladi.

“Endi manipulyatsiyaga yana bir urinish bo‘ldi: negadir hamma 8 maygacha kutishi va shundan keyingina parad paytida Putinga sukut saqlash uchun o‘t ochishni to‘xtatish kerak.
Biz paradlarni emas, odamlarning hayotini qadrlaymiz.

Shuning uchun biz ishonamiz - dunyo ishonadi - 8 mayni kutishga hech qanday sabab yo‘q. Va o‘t ochish ular yana o‘ldirishni boshlashi mumkin bo‘lmasligi uchun bir necha kundan ortiq to‘xtashi kerak. Darhol, to‘liq va so‘zsiz o‘t ochishni to‘xtatish – va kamida 30 kun, bu kafolatlangan va xavfsiz bo‘lishi uchun”, dedi Zelenskiy.

O‘sha murojaatida Ukraina rahbari Cherkas viloyatida dron hujumidan keyin gaz ta’minotini tiklashga harakat qilayotganini aytdi. Uning so‘zlariga ko‘ra, “dunyoning Rossiyaga sukunat o‘rnatish talablari fonida” Rossiya Federatsiyasi yana “urush haqida emas, balki odamlar haqida bo‘lgan ob’ektga” zarba bergan.

Avvalroq Ukraina Tashqi ishlar vazirligi ham Putinning bayonotlariga xuddi shunday javob qaytargan edi. 

“Agar Rossiya haqiqatan ham tinchlikni xohlasa, darhol o‘t ochish to‘xtashi kerak”, degan TIV rahbari Andrey Sibiga.

Uning so‘zlariga ko‘ra, 8 mayni kutishning hojati yo‘q, “agar hozir istalgan sanadan boshlab va 30 kun davomida o‘t ochishni to‘xtatish mumkin bo‘lsa, bu shunchaki parad uchun emas, balki haqiqiy otashkesim bo‘lishi uchun bo‘lardi”.

“Ukraina uzoq muddatli, ishonchli va to‘liq o‘t ochishni to‘xtatishni qo‘llab-quvvatlashga tayyor. Va biz buni doimiy ravishda taklif qilamiz - kamida 30 kun”, deb ta’kidladi Sibiga.

Vashington ham Putinning taklifiga nisbatan ishtiyoqsiz fikrlarni bildirdi. 

“AQSH Prezidenti Donald Tramp Ukrainada vaqtinchalik emas, doimiy o‘t ochishni to‘xtatishni istaydi”, dedi Oq uy matbuot kotibi Kerolayn Livitt.

Eslatib o‘tamiz, avvalroq Putin Ukrainada 8-10 may kunlari bir tomonlama ravishda o‘t ochishni to‘xtatishni e’lon qilgan va bu qarorga Ikkinchi jahon urushida Germaniya ustidan qozonilgan g‘alabaning 80 yilligi va “gumanitar mulohazalar” sabab qilib ko‘rsatgan edi.

Kreml Kiyevni “bundan o‘rnak olishga” chaqirdi va o‘t ochishni to‘xtatish rejimi buzilgan taqdirda “adekvat va samarali javob” bilan tahdid qildi.

Ukrainaga qarshi to‘rtinchi yildan beri urush olib borayotgan Rossiya oxirgi marta Pasxa bayramlarida – 19-21 aprel kunlari bir tomonlama sulh e’lon qilgan edi.