Putin va Szinpin Pekinda ikki tomonlama muzokara o‘tkazmoqda

Xitoyning Pekin shahrida kengaytirilgan tarkibda Rossiya-Xitoy muzokaralari boshlandi. Rossiya Prezidenti Vladimir Putin va Xitoy rahbari Si Szinpin Xalq majlislari zalida uchrashdi. Bu haqda TASS xabar berdi.

Putin boshchiligidagi Rossiya delegatsiyasi tarkibiga ikki bosh vazir o‘rinbosarlari – Aleksandr Novak va Dmitriy Chernishenko ham kiritilgan. Shuningdek, Rossiya Tashqi ishlar vazirligi, Moliya vazirligi, Iqtisodiy rivojlanish vazirligi, Sharqiy taraqqiyot vazirligi, Markaziy bank va boshqa idoralar rahbarlari ham delegatsiya tarkibidan o‘rin olgan.

Biznes vakillari orasida “Gazprom” va “Rosneft” rahbarlari Aleksey Miller va Igor Sechin, Sberbank va VTB rahbarlari German Gref va Andrey Kostin, shuningdek, Leonid Mixelson, Gennadiy Timchenko va boshqalar bor.

Qayd etilishicha, muzokaralar davomida xalqaro ishlar va mintaqaviy mojarolar, jumladan, Ukraina bo‘yicha batafsil fikr almashiladi.

Rossiya rahbarining matbuot kotibi Dmitriy Peskov e’lon qilganidek, Putin katta ehtimol bilan Ukraina urushidagi vaziyatga o‘z bahosini beradi, XXR raisi esa o‘z fikri bilan o‘rtoqlashadi.

Rossiya tomoni Falastin-Isroil mojarosining keskinlashuvi kun tartibida bo‘lishini tan olgan.

Mamlakat Prezidenti Pokiston Bosh vaziri Anvar-ul-Haq Kakar bilan ham muloqot qilishi rejalashtirilgan.

Eslatib o‘tamiz, avvalroq Pekin shahridagi Xalq majlislari uyida “Bir makon, bir yo‘l” uchinchi xalqaro forumida ishtirok etayotgan delegatsiyalar rahbarlarini rasmiy kutib olish marosimi bo‘lib o‘tgan edi. Marosim doirasida O‘zbekiston Respublikasi Prezidenti Shavkat Mirziyoyev va rafiqasi tantanali kutib olingandi.