Putin va Kim Chen In kosmodromda uchrashdi (video)

Rossiya Prezidenti Vladimir Putin va Shimoliy Koreya yetakchisi Kim Chen In “Vostochniy” kosmodromida qisqa suhbatlashdi. Bu haqda bugun, 13 sentyabr kuni RIA Novosti xabar berdi.

“Sizning band bo‘lishingizga qaramay, bizni taklif qilganingiz uchun tashakkur”, degan Shimoliy Koreya rahbari Putinga.

Uchrashuv marosimi Yagona texnik majmuaning raketa-tashuvchilarni o‘rnatish va sinovdan o‘tkazish binosiga asosiy kirish eshigida bo‘lib o‘tgan. Davlat rahbarlari kosmodromni ko‘zdan kechirishi, so‘ngra muzokaralar o‘tkazishi kutilmoqda.

KXDR rahbari poyezdda “Vostochniy” vokzaliga, montaj-sinov binosi yonidagi yo‘lga yetib keldi.

Kim Chen In vagoniga qizil gilam to‘shalgan, uning ikki tomonida davlatlar bayrog‘i bilan Sharqiy harbiy okrug faxriy qorovullari saf tortgan. Shimoliy Koreya rahbarini Rossiya va KXDR hukumatlararo komissiyasi rahbari, Tabiiy resurslar va atrof-muhit vaziri Aleksandr Kozlov hamda Tashqi ishlar vazirligi Davlat protokoli departamenti direktori Igor Bogdashev kutib olgan.

Ma’lumot uchun, Kim Chen In Putinning taklifiga binoan Rossiyaga tashrif buyurmoqda. Rossiya yetakchisining matbuot kotibi Dmitriy Peskov davlat rahbarlarining delegatsiyalari o‘rtasidagi hamda yakkama-yakka bo‘lib o‘tadigan muzokaralarda ikki tomonlama hamkorlik, jumladan, savdo-iqtisodiy aloqalar va madaniy almashinuvlar masalalari ko‘tarilishini ma’lum qilgan. Shuningdek, Kreml vakilining so‘zlariga ko‘ra, mintaqadagi vaziyat va umuman xalqaro masalalar yuzasidan fikr almashiladi.

Eslatib o‘tamiz, Kim Chen In joriy yilning 10 sentyabr kuni tushdan keyin maxsus poyezdda Pxenyanni tark etgandi. Kecha, 12 sentyabr kuni Kim Chen In Rossiyaga yetib keldi hamda Rossiya Tabiat vaziri Aleksandr Kozlov va Primorsk o‘lkasi gubernatori Oleg Kojemyako bilan muzokara o‘tkazdi.