Putin Ukraina kuchlari Zaporoje yo‘nalishida faollashganini aytdi (video)

Bugun, 27 iyul kuni Rossiya Prezidenti Vladimir Putin Sankt-Peterburgda bo‘lib o‘tayotgan Rossiya-Afrika forumi chog‘ida jurnalistlar bilan uchrashib, ularning Ukrainaning qarshi hujumi to‘g‘risidagi savollariga javob berdi. Putinning nutqi Kremlning ijtimoiy tarmoqdagi sahifasida e’lon qilindi. 

Rossiya rahbarining aytishicha, Ukrainaning qarshi hujumi joriy yilning 4 iyun kuni boshlangan. So‘nggi kunlarda janglar yanada kuchaygan. Ukraina Qurolli kuchlarining asosiy zarbasi Zaporoje yo‘nalishida bo‘lgan.

“Haqiqatan ham biz jangovar harakatlar kuchayganini tasdiqlaymiz, asosiy to‘qnashuvlar Zaporoje yo‘nalishida bo‘lgan”, dedi Rossiya Prezidenti.

Shuningdek, Putin Ukraina kuchlari muvaffaqiyatga erisha olmagani va barcha qarshi hujumga urinishlar Rossiya tomonidan qaytarilganini da’vo qilgan. Prezidentning ta’kidlashicha, Ukraina kechagi janglarda Zaporoje yo‘nalishida 200 dan ortiq kishini yo‘qotgan. Rossiyaning yo‘qotishlari esa bundan 10 baravar kam bo‘lgan.

Bundan tashqari, Putin Ukraina Qurolli kuchlari tomonidan tashlandiq texnika, yaradorlar va halok bo‘lganlarning jasadlarini qaytarishga urinish bo‘lganini aytgan.

Eslatib o‘tamiz, oldinroq “The New York Times” gazetasi ham Pentagondagi ikki manbaga tayanib, Ukraina Qurolli Kuchlari asosiy hujumni mamlakat janubi-sharqidagi Zaporoje viloyatiga qaratishini yozgandi.