Putin Trampni tabrikladi (video)

Rossiya Prezidenti Vladimir Putin AQSHning saylangan prezidenti Donald Trampni lavozimga kirishishi bilan tabriklab, Moskva hech qachon Vashington bilan muloqotdan bosh tortmaganini ta’kidladi. Bu haqda bugun, 20 yanvar kuni Rossiya yetakchisi Xavfsizlik kengashi a’zolari bilan bo‘lib o‘tgan tezkor yig‘ilishda ma’lum qildi.

“Moskva Ukraina mojarosi bo‘yicha AQSHning yangi ma’muriyati bilan muloqotga ochiq”, degan u.

Qayd etilishicha, markaziy mavzulardan biri AQSHdagi yangi ma’muriyat bilan munosabatlarni yaxshilash bo‘lgan.

“Biz AQSHning yangi prezidenti va uning jamoasi a’zolarining Rossiya bilan to‘g‘ridan-to‘g‘ri aloqalarni tiklash istagi to‘g‘risidagi bayonotlarini, bizning aybimiz bo‘lmagan holda, iste’foga chiqqan ma’muriyat tomonidan uzilib qolganini ko‘ryapmiz”, degan Putin.

Uning so‘zlariga ko‘ra, Kreml Trampning uchinchi jahon urushining oldini olish zarurligi haqidagi bayonotlarini ham eshitmoqda.

“Albatta, biz bu kayfiyatni olqishlaymiz va Qo‘shma Shtatlarning saylangan prezidentini lavozimga kirishishi bilan tabriklaymiz”, deya qo‘shimcha qilgan Prezident.

Uning so‘zlariga ko‘ra, Rossiya hech qachon muloqotdan bosh tortmagan va har qanday Amerika ma’muriyati bilan “silliq hamkorlik aloqalarini” saqlab turishga doim tayyor bo‘lgan.

Eslatib o‘tamiz, Shveysariya Tashqi ishlar vazirligi vakili Nikolas Bido joriy yilning 10 yanvar kuni chop etilgan mahalliy “Le Temps” nashriga bergan intervyusida AQSHning saylangan prezidenti Donald Tramp va Rossiya Prezidenti Vladimir Putin o‘rtasida kutilayotgan uchrashuv Shveysariyada bo‘lib o‘tishi mumkinligini aytgandi. Diplomatning so‘zlariga ko‘ra, Shveysariya AQSH va Rossiya rahbarlarining sammitini so‘rasa, uni o‘tkazishga tayyor.