Putin Trampni tabrikladi

Rossiya Prezidenti Vladimir Putin respublikachi Donald Trampni AQSH prezidentlik saylovidagi g‘alabasi bilan omma oldida tabrikladi. Bu haqda u Sochidagi “Valday” xalqaro munozara klubining 21-yig‘ilishida so‘z ochdi.

Putin, shuningdek, Trampning Rossiya bilan munosabatlarni tiklash va Ukraina inqirozini tugatishga yordam berish istagi haqidagi ommaviy bayonotlariga e’tibor qaratgan.

“Fursatdan foydalanib, uni AQSH prezidenti etib saylangani bilan tabriklayman, aytganimdek, biz Amerika xalqi ishonch bildirgan har qanday davlat rahbari bilan ishlaymiz”, degan Putin.

Rossiya Prezidenti Trampni mard inson sifatida ta’riflab, uning suiqasd paytidagi xatti-harakatlaridan hayratda ekanini bildirgan.

“O‘z hayotiga suiqasd paytida uning xatti-harakati meni hayratda qoldirdi va bu shunchaki qo‘l ko‘tarish va o‘z ideallari uchun kurashishga chaqirish emas. U g‘ayrioddiy sharoitlarda o‘zini namoyon qildi va juda jasoratli ekanini ko‘rsatdi”, degan Putin.

Bundan tashqari, Rossiya Prezidenti Tramp bilan muloqotga tayyor ekani va unga qo‘ng‘iroq qilishni uyat deb hisoblamasligini ma’lum qilgan.

Ma’lumot uchun, Tramp 2016 yilgi saylovda g‘alaba qozongan, ammo 2020 yilgi saylovda mag‘lub bo‘lgan. Shundan so‘ng, u 2020 yilgi saylovda keng ko‘lamli firibgarlik bo‘lganini da’vo qilib keladi. Ushbu da’volar 2021 yil 6 yanvar kuni Kapitoliyga hujumga olib kelgan bo‘lib, Tramp tarafdorlari Prezident Baydenning g‘alabasini tasdiqlash jarayonini to‘xtatishga harakat qilgan.

Eslatib o‘tamiz, oldinroq NATO Bosh kotibi Mark Ryutte, Isroil Bosh vaziri Binyamin Netanyaxu, Fransiya Prezidenti Emmanuel Makron, Yevropa Komissiyasi rahbari Ursula fon der Lyayen va Ukraina Prezidenti Vladimir Zelenskiy, Markaziy Osiyo yetakchilaridan Qirg‘iziston Prezidenti Sadir Japarov, Qozog‘iston Prezidenti Qosim-Jomart To‘qayev va O‘zbekiston Respublikasi Prezidenti Shavkat Mirziyoyev, AQSHning sobiq prezidenti, demokrat Barak Obama Donald Trampni Amerika Qo‘shma Shtatlari Prezidenti etib saylangani bilan tabrikladi.