Обама ҳам Трампни ғалабаси билан табриклади

АҚШнинг собиқ президенти, демократ Барак Обама республикачи Дональд Трампни президентлик сайловидаги ғалабаси билан табриклади. Бу ҳақда бугун, 7 ноябрга ўтар кечаси AFP хабар берди.

Рафиқаси Мишель билан сайловолди кампаниясида Демократик партиядаги Камола Ҳаррисни фаол қўллаб-қувватлаган Обама ҳокимиятнинг тинч йўл билан ўтказилиши муҳимлигини таъкидлаган.

“Очиғи, бу биз кутган натижа эмас. Лекин демократияда яшаш бизнинг позициямиз ҳар доим ҳам ғалаба қозонмаслигини қабул қила олиш ва ҳокимиятнинг тинч йўл билан ўтказилишига рози бўлишни ҳам англатади”, деди собиқ президент.

Барак Обама АҚШнинг амалдаги вице-президенти Камола Ҳаррис ва унинг сайловдаги шериги Тим Уолзни “ажойиб кампанияни бошқарган икки фавқулодда давлат хизматчиси” деб атади.

Ҳарриснинг ўзи ҳам кеча, 6 ноябрь куни Трампга қўнғироқ қилиб, уни ғалабаси билан табриклаган. Шу билан бирга, у ҳокимиятнинг тинч йўл билан алмашиши муҳимлигини ва президент сифатида барча америкаликларнинг манфаатларини ҳисобга олиш зарурлигини таъкидлади. Шу билан бирга, демократ “барча одамлар учун эркинлик, имконият, адолат ва қадр-қиммат учун ҳамда Америка халқининг қалбини ташкил этувчи ғоялар учун” курашни тўхтатмаслигини қўшимча қилди.  

Айни пайтда Дональд Трампнинг сайловолди штаб-квартираси 7 ноябрга ўтар кечаси яқин ҳафталарда ҳукумат лавозимларига номзодлар тўғрисида қарор қабул қилишини маълум қилди. 

“Улар сайланган президент раҳбарлигида ишлайди ва америкаликларнинг ҳаётини молиявий жиҳатдан қулай ва хавфсиз қиладиган сиёсатни амалга оширади”, дейилади штаб-квартира хабарида.

Республикачилар Конгресснинг ҳар икки палатасида 2021 йилдан бери биринчи марта Сенатда кўпчилик ўринни қўлга киритиши кутилмоқда.

Эслатиб ўтамиз, олдинроқ НАТО Бош котиби Марк Рютте, Исроил Бош вазири Биньямин Нетаньяху, Франция Президенти Эммануэль Макрон, Европа Комиссияси раҳбари Урсула фон дер Ляйен ва Украина Президенти Владимир Зеленский, Марказий Осиё етакчиларидан Қирғизистон Президенти Садир Жапаров, Қозоғистон Президенти Қосим-Жомарт Тўқаев ва Ўзбекистон Республикаси Президенти Шавкат Мирзиёев Дональд Трампни Америка Қўшма Штатлари Президенти этиб сайлангани билан табриклади.

Жасмина Расулова