Putin sulhning o‘ziga tegishli qismini bajaradi – Tramp

AQSH Prezidenti Donald Tramp Rossiya Prezidenti Vladimir Putin Ukrainada o‘t ochishni to‘xtatish bo‘yicha “kelishuvning o‘ziga tegishli qismini” bajarishiga ishonadi. Bu haqda u kecha, 31 mart kuni Oq uyda jurnalistlar bilan suhbat chog‘ida ma’lum qildi.

“U ishni oxirini ko‘rishiga ishonch hosil qilmoqchiman. O‘ylaymanki, u menga aytganini qiladi va endi kelishuvning o‘ziga tegishli qismini bajaradi deb o‘ylayman”, dedi Tramp.

Shu bilan birga, Tramp kerak bo‘lsa, Rossiyaga nisbatan iqtisodiy bosimni kuchaytirishga tayyor ekanini ta’kidladi: 

“Men uning (Vladimir Putinning) neftiga ikkinchi darajali bojlar joriy qilishni xohlamayman. Ammo agar uni bu ishga mos kelmaydi deb o‘ylasam, shunday qilgan bo‘lardim”, deydi AQSH yetakchisi.

Bundan tashqari, Amerika yetakchisi Kiyev bilan foydali qazilmalarni qazib olish bo‘yicha kelishuvga izoh berib, Ukraina Prezidenti Vladimir Zelenskiyni bir kun avval buzishga uringanlikda aybladi.

“Men ular bilan (Ukraina) hali gaplashganim yo‘q, lekin siz (jurnalistlar) orqali ular hozir nima deyishayotganini eshitdim: Xo‘sh, agar biz NATOga yoki biror narsaga kirsak, bu kelishuvni qabul qilaman. Birinchidan, bu hech qachon muhokama qilinmagan. Putindan ancha oldin ular (Rossiya) NATOga qo‘shilmaysizlar degan”, dedi u.

Eslatib o‘tamiz, 30 mart kuni Tramp Putinga Rossiya neftiga ikkilamchi tariflar, Zelenskiyga esa katta muammolar bilan tahdid qilgandi.