Putin Si Szinpinga Uitkoff bilan suhbatning asosiy natijalarini aytib berdi

Rossiya Prezidenti Vladimir Putin Xitoy rahbari Si Szinpinga telefon orqali AQSH yetakchisining maxsus vakili Stiv Uitkoff bilan suhbatining asosiy natijalari haqida ma’lum qildi. Bu haqda Kreml matbuot xizmati xabar berdi.

“Ikki davlat o‘rtasidagi har tomonlama sheriklik va strategik hamkorlik ruhida Rossiya Prezidenti Xitoy Xalq Respublikasi Raisiga 6 avgust kuni AQSH Prezidentining maxsus vakili Stiv Uitkoff bilan bo‘lib o‘tgan suhbatning asosiy natijalari haqida gapirib berdi”, deyiladi xabarda.

Si Szinpin taqdim etilgan ma’lumotlar uchun minnatdorlik bildirib, Ukraina inqirozini uzoq muddatli hal etish tarafdori ekanini bildirdi.

6 avgust kuni Putin AQSH Prezidentining Kremldagi vakili bilan gaplashdi. Davlat rahbarining yordamchisi Yuriy Ushakovning ta’kidlashicha, yaqin kunlarda ikki davlat rahbarlarining shaxsiy uchrashuvini o‘tkazishga kelishib olingan va sammit bo‘yicha ishlar boshlab yuborilgan.

Putin va Si Szinpin Rossiya yetakchisining Xitoyga kutilayotgan tashrifini ham muhokama qilgan.

“Davlat rahbarlari, shuningdek, ikki tomonlama va xalqaro kun tartibidagi ayrim dolzarb masalalarni, jumladan, Vladimir Putinning Shanxay hamkorlik tashkiloti sammitida ishtirok etish uchun Xitoyga bo‘lajak tashrifi hamda militaristik Yaponiya ustidan qozonilgan G‘alabaning 80 yilligi hamda Ikkinchi jahon urushi yakunlanganini nishonlashga tayyorgarlik ko‘rish kontekstida muhokama qildi”, deyiladi Kreml xabarida.

TASS xabariga ko‘ra, joriy yil avgust oyining oxiri – sentyabr oyining boshida Putin Xitoyga tashrif buyuradi, u tashrif davomida Ikkinchi jahon urushidagi G‘alabaning 80 yilligiga va Xitoy xalqining Yaponiya agressiyasiga qarshi qarshilik ko‘rsatish urushiga bag‘ishlangan tadbirlarda ishtirok etadi. Xususan, 3 sentyabr kuni Pekinda keng ko‘lamli harbiy parad bo‘lib o‘tadi, unda Xitoy o‘z arsenalida milliy ishlab chiqarilgan ilg‘or texnikalarni taqdim etadi.

Eslatib o‘tamiz, avvalroq Xitoy rahbari Si Szinpin Rossiya Prezidenti Vladimir Putin bilan telefon orqali muloqot qilgandi. Muloqot chog‘ida Si Szinpin Pekin Moskva va Vashington o‘rtasidagi aloqalarni davom ettirishni olqishlashini aytgan. Suhbat Rossiya tashabbusi bilan bo‘lib o‘tgandi. Ammo boshqa tafsilotlar ochiqlanmagandi.