Putin Rossiyaning NATO bilan ehtimoliy urushi haqida gapirdi

Rossiya kelajakda NATO davlatlariga hujum qilmoqchi emas. Bu haqda Rossiya Prezidenti Vladimir Putin Mudofaa vazirligi kollegiyasining kengaytirilgan yig‘ilishida aytib o‘tdi.

Rossiya Federatsiyasi Prezidentining so‘zlariga ko‘ra, “Rossiya tahdidi” mavzusini Yevropa qit’asidagi “xo‘jayin” maqomini yo‘qotishdan qo‘rqqan Qo‘shma Shtatlar ilgari surmoqda.

“NATO davlatlari bilan urush bizga nega kerak? Bugun ham, ertaga ham ular bilan to‘qnashish bizning rejamizda yo‘q. Menimcha, ular ham buni xohlashmaydi. Unda nega [AQSH] bunday deyapti? Ularni pul to‘lashga undash uchun, mana gap qayerda”, deydi Putin.

Rossiya rahbarining so‘zlariga ko‘ra, Qo‘shma Shtatlar Yevropani Ukrainadagi mojaroga tortib, o‘zi xohlagan narsaga erishdi.

“AQSH o‘zining dolzarb muammolarini hal qilib, o‘zlari ishonganidek, Ukrainani ajratib, Rossiyaning Yevropa bilan munosabatlarini uzdi. Afsuski, niyatiga yetdi. Biz shunchaki boshqacha yo‘l topolmadik. Yoki hamma narsani shundoqligicha topshirib, ularning asli ruslarniki bo‘lgan hamma narsani yeb, shovqin ko‘tarishini tomosha qilish kerak edi. Biz buni qila olmadik. Hozir ular moliyaviy mas’uliyat va to‘lovlar yukini Yevropaga yuklayapti va G‘arbdagi bugungi siyosatchilarning irodasi zaif va umurtqasiz avlodi bunga qarshi tura olmaydi”, deya qo‘shimcha qildi u.

Bundan tashqari, Rossiya Prezidenti Sharqiy va Markaziy Yevropada alyans qo‘shinlari sonining ko‘payishiga e’tibor qaratdi.

“Biz bilganimizdek, Finlyandiya allaqachon NATOda va Shvetsiya ham a’zo bo‘lishni rejalashtirmoqda. Darhaqiqat, bu ittifoqning chegaralarimizga yaqinlashishining navbatdagi bosqichini anglatadi. Eslatib qo‘yay, biz hammamiz yaxshi bilamiz, 1991 yilda ular Gorbachyovga: yo‘q, yo‘q, sharqqa bir dyuym ham kengaymaymiz, deb va’da qilgan. Mana, marhamat, ko‘ring. Mana qanday hamkor ular. Shunchaki har qadamda uyatsizlarcha yolg‘on gapirishadi. Shu tariqa blokning tajovuzkor tabiati endilikda “mudofaa” tuzilmalari ortida yashirinolmayapti”, degan Putin.

Shuningdek, u G‘arb Rossiyani jilovlash strategiyasidan va Ukrainadagi agressiv maqsadlaridan voz kechmayotgani, shu bilan bir qatorda, Rossiya ham “maxsus harbiy operatsiya” maqsadlaridan voz kechmoqchi emasligini qo‘shimcha qilgan.

Putinning fikricha, faqat Rossiya Ukraina davlatining hududiy yaxlitligining kafolati bo‘lishi mumkin.

“Istamaysizmi? Kerak emas. Tarix hamma narsani o‘z o‘rniga qo‘yadi. Biz aralashmaymiz, lekin o‘zimiznikidan voz kechmaymiz”, deydi Putin.

Uchrashuvda Rossiya Federatsiyasi Prezidenti mudofaa sohasidagi qator ustuvor va tizimli vazifalarga ham e’tibor qaratgan.

“Harbiy tahdidlar xarakterining o‘zgarishi va yangi harbiy-siyosiy xatarlarning paydo bo‘lishi sharoitida dunyoda kuchlar, strategik kuchlar muvozanatini ta’minlovchi yadro uchligining roli sezilarli darajada oshdi. Joriy yilda qurollanish bo‘yicha davlat dasturining izchil tartibda amalga oshirilishi va mudofaa korxonalarining samarali faoliyati tufayli strategik yadroviy kuchlarning zamonaviy qurol-yarog‘ va texnika bilan ta’minlanish darajasi, umuman olganda, 95 foizga, dengiz floti qismi esa qariyb 100 foizga yetkazildi”, deydi Putin.

Unga ko‘ra, yil oxirigacha strategik raketa qo‘shinlarida “Yars” va “Avangard” raketa tizimlarining 15 ta uchirish moslamasi jangovar navbatchilikka o‘tkaziladi.

“Biz to‘rtta suvosti kemasini oldik, yaqinda ikki, o‘tgan hafta men “Krasnoyarsk” ko‘p maqsadli yadro suvosti kemasini va "Bulava" ballistik raketalari bilan jihozlangan ”Imperator Aleksandr III” ni qabul qildim", deydi Putin.

Prezident yuqori aniqlikdagi raketalar va har xil turdagi dronlarni ishlab chiqarish va yetkazib berishni jiddiy ravishda oshirish zarurligini ta’kidlagan. Uning aytishicha, joriy yilda harbiy-sanoat majmuasi mehnati tufayli zirhli texnika yetkazib berish hajmi 3 barobar, avtomobillarni yetkazib berish hajmi esa 4,5 barobar oshdi. Umuman olganda, sotib olingan asosiy qurol turlari soni 2,7 baravarga, ayniqsa talab – yetti baravarga oshgan.