Putin Pezeshkiyonga ta’ziya bildirdi

Bugun, 13 iyun kuni Rossiya Prezidenti Vladimir Putin Eron Prezidenti Mas’ud Pezeshkiyon bilan telefon orqali muloqot o‘tkazdi. Bu haqda Kreml xabar berdi.

Ushbu suhbat Isroilning Eronga qarshi kuch ishlatishi oqibatida yuzaga kelgan keskinlik fonida bo‘lgan.

Rossiya Prezidenti Isroil zarbalari sabab halok bo‘lgan Eron rahbariyati va xalqiga hamdardlik bildirgan.

Vladimir Putin Rossiya Isroilning BMT Nizomi va xalqaro huquq normalariga zid harakatlarini qoralashini ta’kidlagan. U Rossiya tomoni Eron yadroviy dasturi atrofidagi vaziyatni tinch yo‘l bilan hal etish bo‘yicha doimo faol harakat qilgani, o‘z taklif va tashabbuslarini ilgari surganini qayd etgan. Shuningdek, Rossiya kelgusida ham Eron va Isroil o‘rtasidagi ziddiyatni yumshatish uchun sa’y-harakatlarini davom ettirishini bildirgan.

Eslatib o‘tamiz, avvalroq Isroil Eronning “yadroviy dasturiga qarshi” zarba berganini e’lon qilgan edi. Isroil Bosh vaziri Binyamin Netanyaxuning aytishicha, operatsiyaning maqsadi “Eron yadroviy infratuzilmasiga, ballistik raketa ishlab chiqaruvchi zavodlariga va harbiy salohiyatiga zarar yetkazish” bo‘lgan.

Hujum oqibatida Eron islom inqilobi qo‘riqchilari korpusi qo‘mondoni general-mayor Husayn Salamiy halok bo‘ldi. IRNA va “Tasnim” axborot agentliklari xabariga ko‘ra, shuningdek, Eron Atom energiyasi tashkilotining sobiq rahbari Fereydun Abbosiy va Islomiy Ozod universiteti prezidenti Muhammad Mehdi Tehronchiy ham vafot etgan.

Eronning davlat IRIB telekanali ham Natanzdagi yadroviy dastur uchun muhim bo‘lgan ob’ektlarda bir nechta portlashlar sodir bo‘lganini xabar qildi.

Eron hukumati esa Isroil tomonidan o‘z hududiga uyushtirilgan, tinch aholi, jumladan, olimlar va harbiylar halok bo‘lgan zarbalariga qattiq javob berishini ma’lum qildi.

O‘zbekistonning Eron va Isroildagi elchixonalari ushbu mamlakatlardagi fuqarolarga ogohlantirish bilan chiqib, qat’iy ehtiyot choralarini ko‘rishga chaqirdi. 

Shuningdek, O‘zbekiston Tashqi ishlar vazirligi ham fuqarolarga tegishli murojaat bilan chiqdi.

Oradan biroz vaqt o‘tib esa, Isroil Eronga qarshi navbatdagi hujumlarini ham boshladi. U Eron shimoli-g‘arbiga yangi va keng ko‘lamli zarbalar berdi. Ushbu hujumlar dronlar yordamida amalga oshirilgan. Tabriz aeroporti yaqinidagi temiryo‘l inshootlariga zarar yetgan, bu hududda havo mudofaa bazalari joylashgan.