Putin Ozarbayjon Prezidentidan uzr so‘radi

Rossiya Prezidenti Vladimir Putin bugun, 28 dekabr kuni Ozarbayjon Prezidenti Ilhom Aliyevga qo‘ng‘iroq qilib, Ozarbayjon havo yo‘llari yo‘lovchi samolyoti bilan bog‘liq fojiali voqea Rossiya havo hududida sodir bo‘lgani uchun uzr so‘radi. Bu haqda Kreml matbuot xizmati xabar berdi. 

"25 dekabr kuni Qozog‘istonning Aktau shahri yaqinida Ozarbayjon havo yo‘llari yo‘lovchi samolyotining halokatga uchrashi bilan bog‘liq masalalar atroflicha muhokama qilindi. Vladimir Putin fojiali voqea Rossiya havo hududida sodir bo‘lgani uchun uzr so‘radi hamda qurbonlarning oila a’zolariga yana bir bor chuqur va samimiy hamdardlik bildirdi va jarohatlanganlarning tezroq sog‘ayib ketishini tiladi", deyiladi xabarda.

Shuningdek, suhbat chog‘ida qat’iy jadval bo‘yicha parvoz qilayotgan Ozarbayjon yo‘lovchi samolyoti Grozniy aeroportiga bir necha bor qo‘nishga uringani ta’kidlandi.

"Bu vaqtda Grozniy, Mozdok va Vladikavkaz Ukraina jangovar uchuvchisiz uchish apparatlari tomonidan hujumga uchradi va Rossiya havo mudofaa tizimlari bu hujumlarni qaytardi.

Rossiya Tergov qo‘mitasi ushbu holat bo‘yicha Jinoyat kodeksining 263-moddasi (harakat xavfsizligi va havo transportidan foydalanish qoidalarini buzish) bilan jinoiy ish qo‘zg‘atdi", deyiladi xabarda.

Bildirilishicha, birlamchi tergov harakatlari olib borilmoqda, fuqarolik va harbiy mutaxassislar so‘roq qilinmoqda. Hozirda Ozarbayjon Bosh prokuraturasining ikki xodimi Grozniyda bo‘lib, u yerda Rossiya Federatsiyasi Bosh prokuraturasi va Tergov qo‘mitasi vakillari bilan hamkorlikda ishlamoqda. Shuningdek, Rossiya, Ozarbayjon va Qozog‘istonning tegishli xizmatlari Aqtau viloyatidagi tabiiy ofat joyida yaqindan hamkorlik qilmoqda.

Embraer 190 samolyotining qulashi

25 dekabr kuni Azerbaijan Airlines aviakompaniyasining Baku-Grozniy yo‘nalishidagi samolyoti halokatga uchradi. Samolyotda 62 nafar yo‘lovchi va besh nafar ekipaj a’zosi bo‘lgan. Samolyot qulashida 38 kishi halok bo‘ldi, 29 kishi omon qoldi. 

Dastlab samolyotning halokatiga qushlar galasi bilan to‘qnashib ketgani sabab bo‘lgani aytilgan edi. Keyinroq “Euronews” Ozarbayjon hukumatidagi manbalariga tayanib, ushbu aviahalokat Rossiya tomonidan uchirilgan yer-havo sinfidagi raketa tufayli sodir bo‘lganini e’lon qildi. Shuningdek, AZAL Embraer 190 samolyoti halokatining dastlabki sababi sifatida tashqi jismoniy va texnik ta’sirlarni ko‘rsatdi.

Ozarbayjonning Raqamli rivojlanish va transport vaziri Rashod Nabiyev ham samolyot halokatiga “tashqi aralashuv” sabab bo‘lgan bo‘lishi mumkinligini aytdi.
AQSH ham laynerning qulashida Rossiyanig havo hujumidan mudofaa tizimlarining ta’sirini ta’kidlamoqda.

Ozarbayjon parlamenti deputati Rasim Musabekov Rossiya tomoni Azerbaijan Airlines fuqarolik samolyotini havo hujumidan mudofaa raketasi bilan urib tushirgani uchun uzr so‘rashi kerakligini aytdi. Rossiya Prezidenti matbuot kotibi Dmitriy Peskov esa Kreml halokatga baho berishni tergov yakunlariga qadar noto‘g‘ri deb bilishini va vaziyatga izoh bermasligini bildirdi.  

Checheniston hukumati esa Ramzan Qodirovning topshirig‘i bilan Baku-Grozniy yo‘nalishidagi AZAL aviakompaniyasiga tegishli samolyot halokati oqibatida vafot etgan va jabrlanganlarning oilalariga moliyaviy va boshqa yordam ko‘rsatishga tayyor ekanini bildirdi. Lekin, Ozarbayjon Prezidenti Ilhom Aliyevning ma’muriyati hech qanday yordamga muhtoj emasligini va bunday yordamni qabul qilmasligini ma’lum qildi.