Putin bilan raqsga tushgan Avstriyaning sobiq vaziri Rossiya qishloqlaridan biriga ko‘chib keldi

Avstriya Tashqi ishlar vazirligining sobiq rahbari Karin Knaysl Yevropani tark etgach, Rossiyaning Ryazan viloyatidagi qishloqlardan biriga ko‘chib keldi. Bu haqda “Vid sboku” nashri xabar berdi.

Nashrga ko‘ra, Knaysl mahalliy bayramda qatnashgan va tanishlari orqali Petrushovoda kvartira ijaraga olganini aytgan.

"Men bir oyga to‘ladim, keyin ko‘ramiz. Kelajagim haqida hech narsa bilmayman", deydi u.

U Sankt-Peterburgdagi universitet markazida ishlayotganini aytib o‘tgan.

“Bu yerga kelish oson bo‘lmadi, lekin men o‘z yo‘limni topishga harakat qilyapman, garchi bu oson bo‘lmasa ham. Menga bu yer yoqadi, bu qishloq juda chiroyli. Men ishlay boshladim, o‘qitish va o‘rganishni davom ettirdim, kitoblarimni yozdim, til o‘rgandim. Men eski hayotimni tashlab, hammasini qaytadan boshlashim kerak edi va 60 yoshda bu oson emas”, deydi Knaysl.

Knaysl 2021 yildan boshlab Rossiyaning “Rosneft” kompaniyasi direktorlar kengashi a’zosi bo‘lgan. U 2017-2019 yillarda Avstriya Tashqi ishlar vazirligini boshqargan holda Rossiya Prezidenti Vladimir Putin bilan yaqin munosabatda bo‘lgan. Putin Knayslning 2018 yilgi to‘yida mehmon bo‘lgan va ular bayram davomida raqsga tushishgan.

O‘tgan yilning may oyida Knaysl “Rosneft” direktorlar kengashi a’zoligidan iste’foga chiqish haqida ariza yozgan.