Pul yuvishda ayblanib, qamalgan sobiq prezident ozodlikka chiqarildi

Peruning sobiq prezidenti Olyanta Humala Konstitutsiyaviy sud uning pul yuvish bo‘yicha 15 yillik qamoq jazosini bekor qilganidan keyin qamoqdan ozod etildi. Bu haqda “Reuters” xabar berdi.

Qayd etilishicha, Humala kecha, 31 iyul kuni kechqurun bir necha sobiq prezidentlar saqlanayotgan maxsus jazoni ijro etish muassasasidan ozod qilingan. U 2011 yilgi prezidentlik saylovi kampaniyasi davomida Braziliyaning Odebrecht (hozirgi Novonor) qurilish kompaniyasidan noqonuniy mablag‘ olganlikda ayblanib, o‘tgan yili hukm qilingan edi.

“Bizni hokimiyatda bo‘lganimiz va siyosiy qarashlarimiz uchun ta’qib qilishdi. Shuning uchun turmush o‘rtog‘im boshpana so‘rashga, farzandlarim esa mamlakatni tark etishga majbur bo‘ldi”, degan markazchi-so‘l siyosatchi qamoqxona darvozasi oldida jurnalistlarga.

Prokuratura Humalaning ozod etilishi yuzasidan izoh bermagan. Ish bo‘yicha Humalaning turmush o‘rtog‘i Nadin Eredia ham qamoq jazosiga hukm qilingan edi. Biroq u Braziliya Prezidenti Luis Inasiu Lula da Silva tomonidan boshpana berilgach, Braziliyada yashamoqda.

Konstitutsiyaviy sud 30 iyul kuni Humalaning hukmini bekor qilgan va shundan so‘ng jinoyat ishlari bo‘yicha sud uni 31 iyul kuni ozod qilish haqida qaror chiqargan.

Bu ish Odebrecht kompaniyasining Lotin Amerikasidagi korrupsiyaviy faoliyati bo‘yicha keng ko‘lamli tergovning bir qismi bo‘lib, Peru siyosiy elitasining ko‘plab vakillarini qamrab olgan. Shu hafta prezidentlik lavozimiga kirishgan Keyko Fuximori ham mazkur kompaniya bilan bog‘liq ehtimoliy saylov mablag‘lari yuzasidan tergov qilingan edi. Konstitutsiyaviy sud o‘tgan yili unga nisbatan ishni ham bekor qilgan.

2016 yilda boshlangan tergovdan keyin uch yil davom etgan sud jarayonida Humala ayblovlarni rad etib, ularni siyosiy sabablarga ko‘ra qo‘yilgan deb atagan.

“Davlat va adliya tizimining yollanma ijrochilari meni garovga oldi”, degan Humala ozodlikka chiqqanidan keyin.

Konstitutsiyaviy sudning ta’kidlashicha, ayblovda tilga olingan davrda saylov kampaniyasi uchun qilingan xayriyalar qonunchilikka ko‘ra pul yuvish jinoyati sifatida baholanmagan. Sud o‘tgan yili Fuximoriga oid ishni ham xuddi shu huquqiy asos bilan bekor qilgan.

Eslatib o‘tamiz, avvalroq Peruda Keyko Fuximori prezident sifatida qasamyod qilgan va shu bilan mamlakatda ilk bor ayol davlat rahbari lavozimni egallagan edi.