Илк аёл президент: Перуда ўн йилда бешинчи марта ҳукумат алмашди (видео)

Бугун, 29 июль куни Перуда Кейко Фухимори президент сифатида қасамёд қилди ва шу билан мамлакатда илк бор аёл давлат раҳбари лавозимни эгаллади. Бу ҳақда “Reuters” хабар берди.

Қайд этилишича, 51 ёшли Кейко Фухимори июнь ойидаги президентлик сайловининг иккинчи босқичида ғалаба қозониб, мамлакатнинг энг таъсирли ва баҳсли сиёсий сулолаларидан бирини ҳокимиятга қайтарган. У маросимдаги илк нутқида мамлакатни бирлаштириш, иқтисодиётни тиклаш ва хавфсизликни мустаҳкамлаш устувор вазифалар бўлишини таъкидлаган.

“Мен ҳокимиятни бошқариш учун зарур қатъият билан бирга халқимизнинг дардини тинглаш ва яраларини даволаш учун зарур ҳассослик билан иш бошлаяпман”, деган Фухимори.

Унинг айтишича, Перу жиноятчилик, иқтисодий қийинчиликлар ва давлат бошқарувига бўлган ишончнинг пасайиши оқибатида оғир ҳолатда қолган.

Кейко Фухимори 2016 йилдан буён Перунинг ўнинчи президенти бўлди. Сўнгги ўн йилликда мамлакатда бирор президент тўлиқ беш йиллик ваколат муддатини якунлай олмаган.

Фухимори ўз ҳукумати АҚШ билан ҳамкорликни кенгайтиришга интилишини билдирган. У Перу АҚШ Президенти Дональд Трамп таклиф қилган трансмиллий жиноятчиликка қарши қаратилган “Америка қалқони” ташаббусига қўшилиши мумкинлигини ҳам айтган.

Маълум қилинишича, қасамёд маросимида АҚШ Давлат котибининг ўринбосари Кристофер Ландау, Аргентина Президенти Хавьер Милей ҳамда бошқа хорижий расмийлар иштирок этган. Шунингдек, Президент янги ҳукумат таркибини ҳам тасдиқлаган. Иқтисодиёт вазири этиб Элмер Куба, ташқи ишлар вазири этиб эса Карлос Эспа тайинланган. Энергетика ва кончилик вазирлигига Гильермо Шинно раҳбар бўлган.

Сайловда Фухимори сўл қанот сиёсатчиси Роберто Санчесни кичик фарқ билан мағлуб этган. Санчес сайлов натижалари юзасидан асоссиз равишда сохталаштириш ҳақида даъволар билдирган ва мухолифатга бошчилик қилишини маълум қилган.

Мутахассислар фикрича, мамлакат парламенти парчаланган таркибга эга бўлгани сабабли Фухиморига қонунчилик ташаббусларини амалга ошириш осон кечмайди.

Маълумот учун, Перу дунёдаги учинчи йирик мис ишлаб чиқарувчи давлат ҳисобланади. Мамлакат Марказий банки 2026 йил учун иқтисодий ўсиш прогнозини 3,4 фоизга оширган бўлса-да, май ойида балиқчилик соҳасидаги пасайиш ва қишлоқ хўжалиги экспортининг қисқариши иқтисодиётнинг иқлим омилларига ҳали ҳам сезгирлигини кўрсатган.

Эслатиб ўтамиз, жорий йилнинг 17 февраль куни Перу Конгресси президент Хосе Херига нисбатан ишончсизлик вотумини эълон қилганди. Бунга 2025 йил декабрида давлат раҳбарининг расмий жадвалга киритилмаган ҳолда хитойлик тадбиркорлар билан учрашувлари сабаб бўлганди.