Пул ювишда айбланиб, қамалган собиқ президент озодликка чиқарилди

Перунинг собиқ президенти Ольянта Ҳумала Конституциявий суд унинг пул ювиш бўйича 15 йиллик қамоқ жазосини бекор қилганидан кейин қамоқдан озод этилди. Бу ҳақда “Reuters” хабар берди.

Қайд этилишича, Ҳумала кеча, 31 июль куни кечқурун бир неча собиқ президентлар сақланаётган махсус жазони ижро этиш муассасасидан озод қилинган. У 2011 йилги президентлик сайлови кампанияси давомида Бразилиянинг Odebrecht (ҳозирги Novonor) қурилиш компаниясидан ноқонуний маблағ олганликда айбланиб, ўтган йили ҳукм қилинган эди.

“Бизни ҳокимиятда бўлганимиз ва сиёсий қарашларимиз учун таъқиб қилишди. Шунинг учун турмуш ўртоғим бошпана сўрашга, фарзандларим эса мамлакатни тарк этишга мажбур бўлди”, деган марказчи-сўл сиёсатчи қамоқхона дарвозаси олдида журналистларга.

Прокуратура Ҳумаланинг озод этилиши юзасидан изоҳ бермаган. Иш бўйича Ҳумаланинг турмуш ўртоғи Надин Эредиа ҳам қамоқ жазосига ҳукм қилинган эди. Бироқ у Бразилия Президенти Луис Инасиу Лула да Силва томонидан бошпана берилгач, Бразилияда яшамоқда.

Конституциявий суд 30 июль куни Ҳумаланинг ҳукмини бекор қилган ва шундан сўнг жиноят ишлари бўйича суд уни 31 июль куни озод қилиш ҳақида қарор чиқарган.

Бу иш Odebrecht компаниясининг Лотин Америкасидаги коррупциявий фаолияти бўйича кенг кўламли терговнинг бир қисми бўлиб, Перу сиёсий элитасининг кўплаб вакилларини қамраб олган. Шу ҳафта президентлик лавозимига киришган Кейко Фухимори ҳам мазкур компания билан боғлиқ эҳтимолий сайлов маблағлари юзасидан тергов қилинган эди. Конституциявий суд ўтган йили унга нисбатан ишни ҳам бекор қилган.

2016 йилда бошланган терговдан кейин уч йил давом этган суд жараёнида Ҳумала айбловларни рад этиб, уларни сиёсий сабабларга кўра қўйилган деб атаган.

“Давлат ва адлия тизимининг ёлланма ижрочилари мени гаровга олди”, деган Ҳумала озодликка чиққанидан кейин.

Конституциявий суднинг таъкидлашича, айбловда тилга олинган даврда сайлов кампанияси учун қилинган хайриялар қонунчиликка кўра пул ювиш жинояти сифатида баҳоланмаган. Суд ўтган йили Фухиморига оид ишни ҳам худди шу ҳуқуқий асос билан бекор қилган.

Эслатиб ўтамиз, аввалроқ Перуда Кейко Фухимори президент сифатида қасамёд қилган ва шу билан мамлакатда илк бор аёл давлат раҳбари лавозимни эгаллаган эди.