PSJ ketma-ket 5-marta Fransiya chempioni bo‘ldi

Kecha, 13 may kuni Liga 1 ning qoldirilgan 29-turida parijliklar “Lans”ni 2:0 hisobida mag‘lub etdi. Ushbu g‘alaba evaziga PSJ 76 ochko to‘plab, muddatidan oldin chempionlik unvonini rasmiylashtirdi.

Dastlab 29-daqiqada Xvicha Kvaratsxeliya hisobni ochgan bo‘lsa, uchrashuvning asosiy vaqtiga qo‘shib berilgan 90+3-daqiqada Ibrohim Mbaye jamoasining ishonchli g‘alabasini rasmiylashtirdi. Shu tariqa, PSJ ketma-ket beshinchi mavsum Fransiya chempionligini qo‘lga kiritdi.

Endilikda “Pari Sen-Jermen” Fransiya chempionatining so‘nggi turida “Parij”ga qarshi o‘z o‘yinini o‘tkazadi. Shundan so‘ng Luis Enrike shogirdlari Chempionlar ligasi finali uchun tayyorgarlikni boshlaydi.

Ma’lumot uchun, Parij klubi so‘nggi bor 2020-2021 mavsumida chempionlikni qo‘lga kirita olmagan edi. O‘sha mavsumda chempionlikni “Lill” nishonlagan bo‘lib, PSJ turnir jadvalida atigi bir ochko ortda qolib, ikkinchi o‘rinni egallagan.