ПСЖ кетма-кет 5-марта Франция чемпиони бўлди

Кеча, 13 май куни Лига 1 нинг қолдирилган 29-турида парижликлар “Ланс”ни 2:0 ҳисобида мағлуб этди. Ушбу ғалаба эвазига ПСЖ 76 очко тўплаб, муддатидан олдин чемпионлик унвонини расмийлаштирди.

Дастлаб 29-дақиқада Хвича Кварацхелия ҳисобни очган бўлса, учрашувнинг асосий вақтига қўшиб берилган 90+3-дақиқада Иброҳим Мбайе жамоасининг ишончли ғалабасини расмийлаштирди. Шу тариқа, ПСЖ кетма-кет бешинчи мавсум Франция чемпионлигини қўлга киритди.

Эндиликда “Пари Сен-Жермен” Франция чемпионатининг сўнгги турида “Париж”га қарши ўз ўйинини ўтказади. Шундан сўнг Луис Энрике шогирдлари Чемпионлар лигаси финали учун тайёргарликни бошлайди.

Маълумот учун, Париж клуби сўнгги бор 2020-2021 мавсумида чемпионликни қўлга кирита олмаган эди. Ўша мавсумда чемпионликни “Лилль” нишонлаган бўлиб, ПСЖ турнир жадвалида атиги бир очко ортда қолиб, иккинчи ўринни эгаллаган.