Prezident sog‘liqni saqlash sohasiga daxldor yana bir qarorni imzoladi
O‘zbekiston
−
19403 6 daqiqa
Kecha, 13 fevral kuni O‘zbekiston Respublikasi Prezidenti Shavkat Mirziyoyev “2019-2025 yillarda O‘zbekiston Respublikasi aholisining ruhiy salomatligini muhofaza qilish xizmatini rivojlantirish konsepsiyasini tasdiqlash to‘g‘risida”gi qarorni imzolagani haqida xabar bergan edik. Davlat rahbari shu kunning o‘zida “Ixtisoslashtirilgan ftiziatriya va pulmonologiya yordami ko‘rsatish tizimini takomillashtirish chora-tadbirlari to‘g‘risida”gi qarorga ham imzo chekdi. Qarorning to‘liq matni bilan quyida tanishishingiz mumkin.
O‘zbekiston Respublikasi Prezidentining
qarori
Respublikada aholi salomatligini muhofaza qilish va sil infeksiyasidan himoyalash, sil va o‘pkaning nospetsifik kasalliklari tarqalishining oldini olish, barqaror sanitariya-epidemiologiya holatini saqlab turish bo‘yicha aniq maqsadga yo‘naltirilgan ishlar amalga oshirilmoqda.
Shu bilan birga, ekologik omillar ta’sirida rivojlanadigan nafas organlari, ayniqsa, surunkali obstruktiv o‘pka kasalliklariga uchragan bemorlar sonining oshishi kuzatilmoqda, respirator patologiyani kasallik rivojlangunga qadar erta skrininglovchi funksional tashxislash amalga oshirilmayapti.
Ftiziatriya va pulmonologiya xizmatlarining integratsiyalashuvi yetarli darajada emasligi respirator kasalliklarga zamonaviy tashxis qo‘yish va ularni davolash usullarini amaliyotga samarali tatbiq etishga imkon bermayapti.
“Ftiziatriya” va “pulmonologiya” mutaxassislarini tayyorlash va malakasini oshirish tizimi zamon talablariga javob bermaydi, natijada hududiy muassasalarning ftizioxirurg, ftiziourolog, ftizioortoped, ftiziooftalmolog, ftizioginekolog, ftiziopediatr, shuningdek, pulmonolog kabi malakali mutaxassislar bilan ta’minlanishi yetarli darajada emasligi kuzatilmoqda.
Ftiziatriya muassasalari moddiy-texnik bazalarining yetarli darajada emasligi, tibbiy jihozlar va texnikalarning yetishmasligi sil kasali va o‘pkaning nospetsifik kasalliklariga chalingan bemorlarga o‘z vaqtida, to‘liq va sifatli tibbiy yordam ko‘rsatishga salbiy ta’sir ko‘rsatmoqda.
Ftiziatriya va pulmonologiya yordami ko‘rsatish tizimini yanada takomillashtirish, shuningdek, mamlakatda barqaror sanitariya-epidemiologiya holatini ta’minlash borasidagi chora-tadbirlarni kuchaytirish hamda mazkur tizim muassasalarining resurs salohiyatini mustahkamlash maqsadida:
1. Quyidagilar O‘zbekiston Respublikasi Sog‘liqni saqlash vazirligining sil va o‘pkaning nospetsifik kasalliklari tarqalishiga qarshi kurashish bo‘yicha asosiy vazifalari etib belgilansin:
mintaqaviy epidemiologik holatni muntazam ravishda tahlil qilish va monitoringini olib borish, sil va uning dorilarga chidamli shakllari, o‘pkaning nospetsifik kasalliklari tarqalishi tendensiyalarini prognoz qilish;
sil va o‘pkaning nospetsifik kasalliklarini keltirib chiqaradigan qo‘zg‘atuvchilarni laborator tashxislash usullarini sifat jihatidan yanada yaxshilash;
innovatsion usullarni joriy qilish asosida sil va nospetsifik o‘pka kasalliklarining oldini olish borasidagi kompleks profilaktika ishlarini amalga oshirish, silning latent shakllarini, silni yuqtirib olish xavfi yuqori bo‘lgan shaxslarni, shuningdek, silning dorilarga chidamli turiga chalingan bemorlar bilan muloqotda bo‘lgan shaxslarni tashxislash va davolashni tashkillashtirish;
sil va o‘pkaning nospetsifik kasalliklarini profilaktika qilish,
o‘z vaqtida tashxislash va davolashga yo‘naltirilgan fundamental, amaliy
va innovatsion loyihalar bo‘yicha ilmiy tadqiqotlarning muvofiqlashtirilishini ta’minlash;
birlamchi tibbiy-sanitariya yordami darajasida barchaga sifatli tibbiyot xizmatlarini ta’minlagan holda silning tarqalishiga qarshi chora-tadbirlarning OIV/OITSni davolash, ona va bola salomatligini muhofaza qilish dasturlari bilan integratsiyasini tashkillashtirish.
2. Quyidagilar:
2019-2021 yillarda sil va o‘pkaning nospetsifik kasalliklari tarqalishiga qarshi kurashish kompleks chora-tadbirlari (keyingi o‘rinlarda – Kompleks chora-tadbirlar) 1-ilovaga muvofiq:
2020-2021 yillarda ftiziatriya muassasalari binolarini rekonstruksiya qilish tadbirlari dasturi 2-ilovaga muvofiq;
2020-2021yillarda ftiziatriya muassasalarini zamonaviy tashxislash, davolash va reanimatsiya uskunalari bilan jihozlash chora-tadbirlari dasturi 3-ilovaga muvofiq;
2020-2021 yillarda silga qarshi sanatoriyalarni zamonaviy reabilitatsiya, tashxislash va laboratoriya uskunalari bilan jihozlash chora-tadbirlari dasturi 4-ilovaga muvofiq tasdiqlansin.
O‘zbekiston Respublikasi Investitsiyalar va tashqi savdo vazirligi Sog‘liqni saqlash vazirligi va Tashqi ishlar vazirligi bilan birgalikda xorijiy davlatlar, xalqaro moliya institutlarining imtiyozli kreditlari (qarzlari)ni, grantlarini ushbu qarorda tasdiqlangan Kompleks chora-tadbirlar va dasturlar bajarilishi uchun jalb qilish bo‘yicha zarur choralarni ko‘rsin.
3. O‘zbekiston Respublikasi Sog‘liqni saqlash vazirligi, Oliy va o‘rta maxsus ta’lim vazirligi hamda Iqtisodiyot va sanoat vazirligining 2019/2020 o‘quv yilidan boshlab Toshkent tibbiyot akademiyasida, keyinchalik boshqa tibbiyot oliy ta’lim muassasalarida “Pulmonologiya” mutaxassisligi bo‘yicha magistraturada kadrlarni tayyorlashni bosqichma-bosqich tashkillashtirish to‘g‘risidagi taklifiga rozilik berilsin.
Belgilab qo‘yilsinki, 2019/2020 o‘quv yilidan boshlab “Ftiziatriya” va “Pulmonologiya” mutaxassisligi bo‘yicha magistratura va klinik ordinaturada kadrlarni tayyorlash faqat davlat grantlari asosida amalga oshiriladi.
4. O‘zbekiston Respublikasi Sog‘liqni saqlash vazirligi:
immunodiagnostikani o‘tkazish maqsadida 2019 yil 1 aprelga qadar
sil kasalligini yuqtirib olish xavfi yuqori bo‘lgan shaxslarning asoslangan kontingentini aniqlasin;
2019 yil 1 mayga qadar Respublika ixtisoslashtirilgan ftiziatriya
va pulmonologiya ilmiy-amaliy tibbiyot markazi va uning hududiy markazlarining yangilangan tashkiliy-shtat tuzilmalarini “Sog‘liqni saqlash” tarmog‘i bo‘yicha ko‘zda tutilgan yillik byudjet mablag‘lari doirasida tasdiqlasin;
2019 yil 1 mayga qadar respublika, viloyat va tuman (shahar) miqyosida ko‘rsatiladigan tibbiy xizmatlar hajmini, pulmonolog xonasini jihozlash standartlarini, mutaxassislarning funksional vazifalarini belgilagan holda pulmonologiya bo‘limlari faoliyatini tashkillashtirishni nazarda tutuvchi pulmonologiya yo‘nalishi bo‘yicha tibbiy yordam ko‘rsatish tartibini tasdiqlasin;
2019 yil 1 iyunga qadar Moliya vazirligi bilan birgalikda O‘zbekiston Respublikasi Vazirlar Mahkamasiga ushbu bandning ikkinchi xatboshida ko‘rsatilgan shaxslarda aniqlangan latent silni tashxislash va davolash tadbirlarini tashkillashtirish, shuningdek, ushbu tadbirlarni moliyalashtirish manbalarini aniqlash bo‘yicha takliflar kiritsin;
O‘zbekiston Respublikasi Innovatsion rivojlanish vazirligi, Investitsiyalar va tashqi savdo vazirligi, Iqtisodiyot va sanoat vazirligi hamda Ekologiya va atrof-muhitni muhofaza qilish davlat qo‘mitasi bilan birgalikda O‘zbekiston Respublikasi Vazirlar Mahkamasiga uch oy muddatda sifatli tashxislash, silga qarshi dori va individual himoya vositalarini ishlab chiqarishni tashkillashtirish va rivojlantirish bo‘yicha takliflar kiritsin;
O‘zbekiston Respublikasi Oliy va o‘rta maxsus ta’lim vazirligi bilan birgalikda tibbiyot oliy ta’lim muassasalarining o‘quv dasturlari va yuklamalarini tanqidiy o‘rganish natijalari asosida tibbiyot oliy ta’lim muassasalarining “Ftiziatriya” kafedralarini “Ftiziatriya va pulmonologiya” kafedralariga qayta ixtisoslashtirish bo‘yicha chora-tadbirlarni amalga oshirsin.
5. O‘zbekiston Respublikasi Innovatsion sog‘liqni saqlash milliy palatasi Sog‘liqni saqlash vazirligi bilan birgalikda 2019 yil 1 sentyabrga qadar sil va o‘pkaning nospetsifik kasalliklari, shuningdek, ftiziatriya muassasalarini moddiy-texnik jihozlashning zamonaviy klinik qo‘llanma va protokollari, tashxis va davolash sifatiga oid standartlarini ishlab chiqsin.
6. O‘zbekiston Respublikasi Moliya vazirligi O‘zbekiston Respublikasining har yilgi Davlat byudjeti parametrlarini shakllantirishda ftiziatriya muassasalarini immunodiagnostika va silga qarshi dori vositalari bilan ta’minlash uchun zarur mablag‘ ajratilishini nazarda tutsin.
7. Quyidagilar:
O‘zbekiston Respublikasi Bosh vaziri o‘rinbosari A.A.Abduhakimovga – ushbu qarorda belgilangan vazifalarning to‘liq bajarilishi bo‘yicha vazirlik va idoralar faoliyatini samarali muvofiqlashtirish hamda uning amalga oshirilishini muntazam ko‘rib chiqish;
O‘zbekiston Respublikasi Bosh vaziri o‘rinbosari J.A.Qo‘chqorovga – ushbu qarorda belgilangan tadbirlarni to‘liq bajarish uchun zarur mablag‘larni o‘z vaqtida va to‘liq miqdorda ajratish;
O‘zbekiston Respublikasi sog‘liqni saqlash vaziri A.K.Shodmonovga – ushbu qarorda belgilangan barcha tadbirlarning o‘z vaqtida va sifatli bajarilishi, ftiziatriya muassasalari va silga qarshi sanatoriyalar binolarining o‘z vaqtida foydalanishga topshirilishi hamda zamonaviy jihozlar bilan ta’minlanishi yuzasidan shaxsiy javobgarligi ko‘rsatib o‘tilsin.
8. O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi, O‘zbekiston Milliy teleradiokompaniyasi va O‘zbekiston Respublikasi Sog‘liqni saqlash vazirligi aholi orasida sil va nospetsifik o‘pka kasalliklarining oldini olish, erta aniqlash, davolash masalalari bo‘yicha axborot-ma’rifat ishlarini muntazam ravishda amalga oshirsin.
9. O‘zbekiston Respublikasi Sog‘liqni saqlash vazirligi manfaatdor vazirlik va idoralar bilan birgalikda bir oy muddatda qonun hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.
10. Mazkur qarorning ijrosini nazorat qilish O‘zbekiston Respublikasi Prezidenti Administratsiyasi rahbari Z.Sh.Nizomiddinov, O‘zbekiston Respublikasi Prezidenti maslahatchisi A.A.Abduvaxitov va O‘zbekiston Respublikasi Bosh vazirining o‘rinbosari A.A.Abduhakimov zimmasiga yuklansin.
O‘zbekiston Respublikasi Prezidenti
Shavkat Mirziyoyev
Toshkent shahri,
2019 yil 13 fevral
Live
Barchasi