Prezident saylovida qariyb 400 ming kishi ovoz berib bo‘ldi

O‘zbekistonda 9 iyulga belgilangan navbatdan tashqari prezidentlik saylovida 400 mingga yaqin fuqaro muddatidan oldin ovoz berdi. Bu haqda O‘zbekiston Markaziy saylov komissiyasi (MSK) matbuot xizmati xabar qildi. 

“2023 yil 1 iyul holatiga ko‘ra,376 623 nafar saylovchi muddatidan oldin ovoz berish huquqidan foydalangan”, deyiladi xabarda. 

Qayd etilishicha, respublikada 275 592 nafar, xorijda 101 031 nafar fuqaro ovoz bergan. 

Avvalroq O‘zbekiston Prezidenti saylovida 19,66 million saylovchi ro‘yxatga olingani, muddatidan oldin ovoz berish 28 iyundan boshlangani va 5 iyulda yakunlanishi haqida xabar berilgan edi. Saylov kodeksiga muvofiq, saylov kuni o‘z yashash joyida bo‘lish imkoniyati bo‘lmagan saylovchi muddatidan oldin ovoz berishi mumkin. Buning uchun u uchastka saylov komissiyasiga saylov kuni kelmaganligi sababi, bu ta’til, xizmat safari, chet elga chiqish yoki boshqa uzrli sabab bo‘lishi mumkinligini ko‘rsatgan holda ariza bilan murojaat qilishi kerak. 

Avvalroq O‘zbekiston Prezidenti Shavkat Mirziyoyev muddatidan oldin prezidentlik saylovlarini o‘tkazishga ruxsat beruvchi qonunni imzolagan, keyin esa o‘z farmoni bilan ularni 9 iyulga tayinlagan edi. Ilgari Saylov kodeksi amaldagi prezident uch oy davomida o‘z vazifasini bajara olmagan taqdirdagina muddatidan oldin saylov o‘tkazishga ruxsat bergan. Bu davrda davlat rahbarining vakolatlari Senat raisiga o‘tgan. O‘zbekistonda so‘nggi muddatidan avval prezident saylovi O‘zbekistonni 27 yil boshqargan Islom Karimov vafotidan so‘ng, 2016 yilning 4 dekabr kuni o‘tkazilgan edi.