Prezident Olmaotada qurilishga moratoriy qo‘yishni buyurdi

Qozog‘iston Prezidenti Qosim-Jomart To‘qayev kecha, 3 avgust kuni Olmaota shahri hokimi Darxan Satibaldini qabul qildi va shaharning yuqori qismida ko‘p xonadonli turarjoylar qurish va obodonlashtirishga moratoriy joriy etish to‘g‘risida farmoyish berdi. Bu haqda Oqo‘rda matbuot xizmati xabar berdi.

Bildirilishicha, ijtimoiy infratuzilma ob’ektlari va bosh rejada nazarda tutilgan turizm klasteri bundan mustasno bo‘ladi.

Davlat rahbari, shuningdek, Bosh rejaga atrof-muhitni muhofaza qilish chora-tadbirlarini kuchaytirish, tog‘oldi zonasini tartibsiz rivojlanishdan himoya qilish va shahar atrof-muhitining mutanosib rivojlanishini ta’minlashga qaratilgan o‘zgartirishlar kiritish haqida topshiriq berdi.

Hokimning so‘zlariga ko‘ra, Olmaotada ko‘p markazli rivojlanish modeli joriy etilmoqda, bu shahar markaziga yukni kamaytiradi va infratuzilmani bir xilda taqsimlashga yordam beradi. Shuningdek, u 2025 yilning birinchi yarmida qisqa muddatli iqtisodiy ko‘rsatkich 11 foizga, asosiy kapitalga yo‘naltirilgan investitsiyalar hajmi esa 25,4 foizga o‘sgani haqida ma’lumot berdi. Uning aytishicha, shaharda samarali transport tizimini yaratishga alohida e’tibor qaratilmoqda.

Shu bilan birga, To‘qayev tabiiy muhitni saqlash va shaharni barqaror rivojlantirish ustuvor vazifa bo‘lib qolishi kerakligini ta’kidladi.