Prezident Qoraqalpog‘istonda. Jo‘qorg‘i Kenges sessiyasida Murat Kamalov ko‘rinmayapti

O‘zbekiston Respublikasi Prezidenti Shavkat Mirziyoyevning Qoraqalpog‘iston Respublikasiga tashrifi boshlandi. Davlat rahbari Qoraqalpog‘iston Respublikasi Jo‘qorg‘i Kengesining navbatdan tashqari 34-sessiyasida ishtirok etmoqda.
 
Prezident kirish so‘zida “Inson qadri uchun” ezgu tamoyili asosidagi tub islohotlar Qoraqalpog‘istonning har bir shahar va tumani, qishloq va ovuli, har bir xonadoniga kirib borishini ta’minlash asosiy maqsadlardan biri ekanini ta’kidlagan. 

"Men Prezident sifatida 6 yil davomida boshqa hududlarga nisbatan eng ko‘p, ya’ni 9 marta mana shu saxovatli zaminga kelib, bu yerdagi oqsoqollar, tadbirkorlar, yoshlar vakillari bilan ko‘p-ko‘p muloqotlar qildim.

Ushbu davrda Qoraqalpog‘istonni kompleks rivojlantirishga qaratilgan 31 ta farmon va qarorlar qabul qildik.

Hududda tadbirkorlik sub’ektlari soni 2 barobarga ortdi, qariyb 4,5 mingta investitsiya loyihalari ishga tushirildi.

Birgina joriy yil fevraldagi tashrif doirasida hududni har taraflama rivojlantirish uchun 1,5 trillion so‘m mablag‘ ajratdik", deydi Prezident.

Yig‘ilishda Qoraqalpog‘istonda ichimlik suv ta’minoti 40 foizdan 68 foizga, maktabgacha ta’lim bilan qamrov darajasi 32 foizdan 76 foizga, aholi daromadlari jon boshiga 2 barobarga oshishiga erishilgani ta’kidlangan.

Avval xabar berganimizdek, sessiyada 2020 yilning oktyabridan buyon Qoraqalpog‘iston Respublikasi Jo‘qorg‘i Kengesi lavozimida ishlab kelayotgan Murat Kamalovni vazifasidan ozod etish masalasi ham ko‘rilishi kutilmoqda. Odatda Prezident tashriflarida, jumladan davlat rahbari ishtirokida o‘tadigan Jo‘qorg‘i Kenges sessiyalarida tribunada Kenges raisi Murat Kamalov o‘tirar edi. Bugun o‘tayotgan sessiyada negadir u o‘z o‘rnida emas.