Prezident bojxonaga oid yangi qonunni imzoladi

O‘zbekiston Respublikasi Prezidenti kecha, 1 noyabr kuni “Bojxona ma’muriyatchiligi takomillashtirilishi munosabati bilan O‘zbekiston Respublikasining Ma’muriy javobgarlik to‘g‘risidagi kodeksiga o‘zgartish va qo‘shimchalar kiritish haqida”gi qonunni imzoladi.

Oliy Majlis Senati a’zosi Nigora Rabbimovaning ta’kidlashicha, qonunda bojxona sohasidagi huquqbuzarliklar uchun jarima miqdorlarini oshirish nazarda tutilgan. Xususan, jarima sanksiyalarining oshirilishi huquqbuzarliklarning quyidagi turlariga nisbatan qo‘llaniladi:

•    tovarlar, transport vositalari va ularning hujjatlarini bojxona organi ruxsatisiz berish, ularni yo‘qotish yoki yetkazib bermaslik;

•    bojxona rasmiylashtiruvi tugallanmagan tovarlar va transport vositalarini tasarruf etish;

•    bojxona nazorati ostidagi tovarlar yuklangan transport vositalari yukxonasini qonunga xilof ravishda ochish;

•    tovarlar va transport vositalarini O‘zbekiston Respublikasining bojxona hududidan tashqariga olib chiqmaslik yoki ularni ushbu hududga qaytarib olib kirmaslik.

Shu bilan birga, qonunda ilgari olib kirilgan tovarlar va transport vositalarini olib chiqmaganlik uchun ma’muriy jazo chorasi qo‘llanilganidan so‘ng ularni o‘ttiz kun muddatda olib chiqmaganlik uchun tovar va transport vositalarini musodara qilish nazarda tutilgan.

Bundan tashqari, 227-1–227-27-moddalarida nazarda tutilgan huquqbuzarliklar uchun transport vositalarini ushlash va ko‘zdan kechirishga doir bojxona organlari mansabdor shaxslarining huquqi mustahkamlangan.