Pavel Durov sud zalidan ozod qilindi – OAV (video)

Sudya Telegram asoschisi Pavel Durovni dastlabki so‘roq qilish va ehtimoliy ayblovlar uchun politsiya hibsxonasida ushlab turishni to‘xtatdi. Bu haqda BFMTV xabar berdi.

"Tergov sudyasi dastlabki so‘roq qilish va ayblov e’lon qilish uchun uni politsiya hibsxonasida ushlab turishni tugatdi", deb xabar berdi fransuz jurnalistlari.

26 avgust kuni Durovni hibsda saqlash muddati 28 avgustgacha uzaytirilgandi. Fransiya qonunchiligi 96 soatgacha hibsga olishga ruxsat beradi. Shundan so‘ng sud sudlanuvchini ozod qilish yoki unga ayblov e’lon qilish, zarurat tug‘ilganda uni hibsda saqlash to‘g‘risida qaror qabul qilishi kerak.

Pavel Durov 24 avgust kuni kechqurun Parij aeroportida qo‘lga olingan. "Politico" nashriga ko‘ra, Fransiya hukumati Durovni hibsga olish uchun orderni 2024 yil 25 martda bergan. Shu bilan birga, uning akasi, Telegram asoschisi Nikolay Durovni hibsga olish uchun order berildi. Hibsga olish uchun orderlar “voyaga yetmaganlarning pornografik tasvirlarini egallash, tarqatish yoki ulardan foydalanishni taklif qilishda ishtirok etganlik” uchun chiqarilgan.

26 avgust kuni tushdan keyin Fransiya prokuraturasi 12 ta jinoyat bo‘yicha noma’lum shaxslarga nisbatan tergov harakatlari olib borilayotgani haqida press-reliz e’lon qildi. Ular orasida vakolatli organlar so‘roviga ko‘ra ma’lumot berishdan bosh tortish, voyaga yetmaganlarning pornografik tasvirlarini saqlashga sheriklik, giyohvand moddalarni tarqatishda ishtirok etish, xakerlik dasturlarini tarqatishda ishtirok etish kabilar bor.