Ozarbayjon kuchlari Armaniston kvadrokopterini to‘xtatdi

Ozarbayjon Qurolli Kuchlari Armaniston kvadrokopteri(to‘rtta aylanadigan dvigatel tomonidan boshqariladigan dron turi)ni to‘xtatdi. Bu haqda Ozarbayjon Mudofaa vazirligi ma’lum qildi.

Aytilishicha, hodisa bugun, 16 avgust kuni mahalliy vaqt bilan taxminan 09:00 da sodir bo‘lgan.

Armaniston Qurolli Kuchlarining kvadrokopteri Naxchivan muxtor respublikasining Sadarak viloyatida joylashgan Ozarbayjon pozitsiyalari uzra parvozlarni amalga oshirishga uringan.

Vazirlik ma’lumotlariga ko‘ra, provokatsiyani bostirish maqsadida Ozarbayjon armiyasi bo‘linmalarining qarshiligi natijasida kvadrokopter Armaniston yo‘nalishiga qaytishga majbur bo‘lgan.

Eslatib o‘tamiz, joriy yilning 9 iyul kuni ham Armaniston Qurolli kuchlariga qarashli kvadrokopterlar tomonidan Naxchivan muxtor respublikasi va Lochin viloyati hududida joylashgan Ozarbayjon armiyasining pozitsiyalari, shuningdek, noqonuniy arman qurolli guruhlariga tegishli dronlar orqali Ozarbayjon Qurolli Kuchlari bo‘linmalarining Xo‘javand viloyati Tagaverd qishlog‘i yo‘nalishidagi pozitsiyalari ustidan razvedka parvozlarini amalga oshirishga urinish bo‘lgandi. O‘shanda ham ko‘rilgan tezkor chora-tadbirlar natijasida ularning harakati to‘xtatilgandi.