Озарбайжон кучлари Арманистон квадрокоптерини тўхтатди

Озарбайжон Қуролли Кучлари Арманистон квадрокоптери(тўртта айланадиган двигатель томонидан бошқариладиган дрон тури)ни тўхтатди. Бу ҳақда Озарбайжон Мудофаа вазирлиги маълум қилди.

Айтилишича, ҳодиса бугун, 16 август куни маҳаллий вақт билан тахминан 09:00 да содир бўлган.

Арманистон Қуролли Кучларининг квадрокоптери Нахчиван мухтор республикасининг Садарак вилоятида жойлашган Озарбайжон позициялари узра парвозларни амалга оширишга уринган.

Вазирлик маълумотларига кўра, провокацияни бостириш мақсадида Озарбайжон армияси бўлинмаларининг қаршилиги натижасида квадрокоптер Арманистон йўналишига қайтишга мажбур бўлган.

Эслатиб ўтамиз, жорий йилнинг 9 июль куни ҳам Арманистон Қуролли кучларига қарашли квадрокоптерлар томонидан Нахчиван мухтор республикаси ва Лочин вилояти ҳудудида жойлашган Озарбайжон армиясининг позициялари, шунингдек, ноқонуний арман қуролли гуруҳларига тегишли дронлар орқали Озарбайжон Қуролли Кучлари бўлинмаларининг Хўжаванд вилояти Тагаверд қишлоғи йўналишидаги позициялари устидан разведка парвозларини амалга оширишга уриниш бўлганди. Ўшанда ҳам кўрилган тезкор чора-тадбирлар натижасида уларнинг ҳаракати тўхтатилганди.