Oston O‘runovga ham Turkiya klubidan taklif tushdi

O‘zbekiston milliy terma jamoasi va “Persepolis” klubi vingeri Oston O‘runov faoliyatini Turkiya chempionati vakili “Beshiktosh” klubida davom ettirishi mumkin. Bu haqda “Sport Tazan” nashri xabar berdi.

Manbaga ko‘ra, “Beshiktosh” klubi o‘zbekistonlik futbolchini o‘z safiga qo‘shib olmoqchi va hozirda uning atrofidagi vaziyatni o‘rganmoqda. Agar O‘runovda jarohatlar bilan bog‘liq muammo bo‘lmasa, turk klubi futbolchini qo‘lga kiritish uchun rasmiy taklif yuboradi. Ammo bu transferga forslar murabbiyi to‘sqinlik qilishi mumkin. Sababi “Persepolis” ustozi Ismoil Kartal O‘runovni jamoada qolishini xohlaydi.

Ma’lumot o‘rnida, yarim himoyachi joriy yilning 21 yanvar kuni Eron chempionati doirasida “Zobahan”ga qarshi o‘yinda jarohat olib maydonni tark etgan edi. Uchrashuvdan keyingi tekshiruvda O‘runovning jarohati ancha jiddiyligi va kamida 5 haftani o‘tkazib yuborishi aytilgandi. Futbolchi jarohatdan tiklana olmadi va O‘zbekiston terma jamoasining mart oyidagi Qirg‘iziston va Eronga qarshi o‘yinlarini o‘tkazib yubordi.

Eslatib o‘tamiz, avvalroq, O‘zbekiston terma jamoasi a’zosi Abbosbek Fayzullayevga Turkiyaning “Galatasaroy” klubidan taklif tushgani haqida xabar berilgan edi.