Osiyo kubogi: O‘zbekiston futzalchilari Turkmanistonni yirik hisobda mag‘lub etdi
Sport
−
27 Sentabr 2022 4244
Bugun, 27 sentyabr kuni Quvaytda futzal bo‘yicha Osiyo kubogi start oldi. “B” guruhidan joy olgan O‘zbekiston terma jamoasi Turkmanistonga qarshi bahs olib bordi va 8:0 hisobida g‘alaba qozondi.
Ucharashuvning 6-daqiqasida Davron Choriyev hisobni ochdi. Goldan keyin ham O‘zbekiston terma jamoasi katta kuch bilan hujumga o‘tdi. Natijada, Mashrab Odilov 13-daqiqada hisobdagi farqni ikkitaga yetkazdi. Oradan ikki daqiqa o‘tib, Ixtiyor Ropiyev o‘zbekistonliklarning uchinchi goliga mualliflik qildi. Shu tariqa, o‘yinning dastlabki bo‘limi 3:0 hisobida yakuniga yetdi.
Ikkinchi taym ham O‘zbekiston terma jamoasining katta ustunligi ostida boshlandi. 22-daqiqada Mashrab Odilov dublni rasmiylashtirgan bo‘lsa, 7 daqiqadan keyin Dilshod Rahmatov ham gol kiritdi. 34-daqiqada o‘zbekistonliklar birato‘la 2 ta gol urdi. Ixtiyor Ropiyev (dubl) va Shahram Faxriddinov o‘z ismini tabloga yozdirib qo‘ydi. 39-daqiqada Akbar Usmonov O‘zbekiston terma jamoasining sakkizinchi goliga mualliflik qildi. O‘yinda boshqa hisob o‘zgarmadi va o‘zbekistonlik futzalchilar 8:0 ko‘rinishidagi yirik g‘alabani rasmiylashtirdi.
O‘zbekiston – Turkmaniston 8:0
Gollar: 1:0 – Choriyev (6), 2:0 – Odilov (13), 3:0 – Ropiyev (15), 4:0 – Odilov (22), 5:0 – Dilshod Rahmatov, 6:0 – Ixtiyor Ropiyev (34), 7:0 – Shahram Faxriddinov (34)
O‘zbekiston (dastlabki beshlik): 12.Ravshan Eliboyev, 4.Ixtiyor Ropiyev, 6.Ilhom Hamroyev, 8.Husniddin Nishonov, 10.Davron Choriyev.
Zaxira: 1.Rustam Umarov (s), 2.Anasxon Rahmatov, 3.Mashrab Odilov, 5.Sunnat Jo‘rayev, 7.Dilshod Rahmatov, 9.Elbek To‘lqinov, 11.Akbar Usmonov, 13.Shahram Faxriddinov, 14.Davlat Ibragimov
Turkmaniston (dastlabki beshlik): 12.Meretgeldi Bayramov (s), 3.Giljimuradov Giljimurat, 4.Maksat Soltanov, 9.Allamirat Kurbanov, 13.Kadir Berenov
Zaxira: 1.Berdimirat Sapardurdiyev, 2.Rovshen Orazmuhammedov, 5.Kerven Annaorazov, 6.Daniil Panchenko, 7.Gurbangeldi Sahedov, 8.Shiri Bayramdurdiyev, 10.Mulkaman Annaguliyev, 11.Vatan Atayev, 14.Maksat Miradov.
