Men O‘zbekistonimdan mamnunman va hatto faxrlanaman – Kannavaro

O‘zbekiston milliy terma jamoasi bosh murabbiyi Fabio Kannavaro Jahon chempionatida katta tajriba orttirgani va hozirgi faoliyatidan mamnun ekanligini aytdi. Bu haqda italiyalik mutaxassis “La Gazzetta dello Sport” nashriga bergan intervyusida so‘z ochdi. 

“Men O‘zbekistonimdan mamnunman va hatto faxrlanaman. Biz yangi yo‘lni boshladik, tarkibning o‘rtacha yoshini sezilarli darajada pasaytirdik va yaxshi natijalarga erishdik. O‘yinlarda ishonchli g‘alabalarni qo‘lga kiritdik. Hatto Janubiy Koreyaga qarshi mag‘lubiyatdan keyin ham maydonni o‘z o‘yinimizdan qoniqish hosil qilgan holda tark etdik”, deydi Kannavaro.

Italiyalik mutaxassis O‘zbekistondagi faoliyatidan katta zavq olayotganini va jamoa tanlangan yo‘ldan mamnunligini bildirgan. Uning aytishicha, Jahon chempionatidagi ishtirok jamoa uchun qimmatli tajriba bo‘lgan.

“Men o‘z ishimdan katta zavq olyapman. O‘zbekistonda biz tanlagan yo‘ldan mamnunmiz. Jahon chempionatida katta ishtiyoq bilan ishtirok etdik va bu musobaqa bizga qimmatli saboqlar berdi. Natijalardan qat’i nazar, biz yanada kuchliroq bo‘ldik. Bu men uchun unutilmas oy, hayotimdagi eng yaxshi davrlardan biri bo‘ldi. Hozir mening vazifam ham, futbolga bo‘lgan qarashim ham boshqacha”, deydi murabbiy.

Shuningdek, murabbiy terma jamoadagi ilk o‘yinini o‘tkazishiga imkoniyat berilgan futbolchi haqida to‘xtaldi.

“Biz milliy terma jamoadagi ilk o‘yinini o‘tkazishiga imkoniyat bergan futbolchimiz bor. U o‘sha uchrashuvdan uch kun o‘tib 17 yoshga to‘ladigan yigit edi. Bunday holatdan qanday qilib mamnun bo‘lmaslik mumkin? Endi bizni Osiyo kubogi kutmoqda. Guruhimiz oson emas, ammo musobaqaga shu paytgacha to‘plagan tajribamiz bilan tayyorlanamiz. Federatsiya ham birgalikda amalga oshirgan ishlarimizdan mamnun”, deydi Kannavaro.

Ma’lumot uchun, 2027 yilgi Osiyo kubogi 7 yanvardan 5 fevralgacha Saudiya Arabistonida bo‘lib o‘tadi. O‘zbekiston terma jamoasi “B” guruhida Bahrayn, Shimoliy Koreya va Iordaniya terma jamoalariga qarshi bahs olib boradi.

Eslatib o‘tamiz, avvalroq O‘zbekiston milliy terma jamoasi joriy yilning noyabr oyida bo‘lib o‘tadigan xalqaro tanaffus payti safarda Saudiya Arabistoni terma jamoasi bilan o‘rtoqlik uchrashuvida maydonga tushishi haqida xabar berilgandi.