“Oltin to‘p”ni orzu qilaman – Karim Benzema 

Ispaniyaning “Real Madrid” jamoasi forvardi Karim Benzema joriy mavsumda Fransiya tashqarisida to‘p tepadigan eng yaxshi fransuz futbolchisi, deb topildi.

Karim Benzema ushbu sovrinni qo‘lga kiritganidan xursand ekanligini va “Oltin to‘p” ham uning orzusi ekinligini aytgan. Bu haqda Benzemaning so‘zlariga tayanib, “RMC Sport” nashri xabar berdi.

“Men Fransiya tashqarisidagi eng yaxshi futbolchi sifatida e’tirof etilganimdan xursandman. Bu sovrin faxrlanish uchun sabab bo‘la oladi. Bu sovrinni qo‘lga kiritish qiyin, chunki Fransiyada yaxshi o‘yinchilar ko‘p. Hamma orzu qilgan hujumchiga aylandimmi? Menimcha ha. Statistika men uchun eng muhim narsa emas. Har doim jamoamga gol urishga yordam berishga harakat qilaman. Albatta, men “Oltin to‘p”ni orzu qilaman, lekin jamoa manfaatini o‘zimdan ustun qo‘ysam, unga erisha olmayman”, degan “Real Madrid” hujumchisi.

Ma’lumot o‘rnida, 34 yoshli hujumchi La liganing 31 o‘yinida 27 gol urgan holda, Ispaniya chempionatining eng yaxshi to‘p urari bo‘lib turibdi. Eng yaqin ta’qibchisi bo‘lgan “Selta” hujumchisi Iago Aspas hisobida esa 35 uchrashuvda 18 ta gol mavjud.

Ma’ruf Abdumalikov