“Oltin to‘p” natijalari tarmoqqa sizdirildi

Bugun, 28 oktyabr kuni Fransiya poytaxti Parij shahridagi “Shatl” teatrida 2024 yil futbol olamidagi eng yaxshilarni aniqlash marosimi bo‘lib o‘tadi. Kechaning eng asosiy qismida yilning eng yaxshi futbolchisi aniqlanib, unga “Oltin to‘p” sovrini topshiriladi.

Marosim boshlanishiga hali ancha vaqt bo‘lsa ham, tarmoqlarga “Oltin to‘p” natijalari sizdirildi.

Internetda tarqalgan suratga ko‘ra, “Oltin to‘p” sovriniga “Real”ning braziliyalik futbolchisi Vinisius Junior ega chiqadi. U sovrinni qo‘lga kiritish uchun 630 ta ovoz yig‘gan. 2-o‘rinda Ispaniya terma jamoasi a’zosi Rodri, 3-o‘rinda esa angliyalik futbolchi Jud Bellingem qayd etilgan.

Eslatib o‘tamiz, avvalroq  “Oltin to‘p”ning ijtimoiy tarmoqdagi rasmiy sahifasida bu yil sovrinni kim qo‘lga kiritishiga shama qilingandi.

Rasmiy sahifaga qo‘yilgan videoda afsonaviy futbolchi Dide Drogba “Oltin to‘p”ni Reseb nomi bilan tanilgan bloger Luva de Pedreyroga topshirdi. E’tiborlisi, bloger Braziliya terma jamoasi libosida edi.