Olimpiada o‘yinlariga 5 ta yangi sport turi qo‘shildi

Flag futbol, kriket, lakros, skvosh va beysbol/softbol 2028 yilda Los-Anjelesda (Kaliforniya, AQSH) o‘tkaziladigan Olimpiada o‘yinlariga rasman kiritildi. Xalqaro olimpiya qo‘mitasi (XOQ) ijroiya qo‘mitasining tegishli taklifi tashkilotning Mumbaydagi sessiyasida qo‘llab-quvvatlandi.

XOQ Ijroiya kengashi 13 oktyabr kuni yangi sport turlarini kiritishni taklif qilgan. Ulardan kriket 1900 yil Parijda o‘tgan Olimpiada o‘yinlarining, ikkinchisi lakros 1904 va 1908 yilgi o‘yinlarning va beysbol/softbol esa 1992, 1996, 2000, 2004, 2008 va 2021 yillardagi o‘yinlarning bir qismi bo‘lgan edi. 

Flag futbol, kriket, lakros, skvosh va beysbol/softbol 30 ta asosiy Olimpiada sport turlariga qo‘shiladi. Agar bu yil Xalqaro boks assotsiatsiyasi (IBA) ba’zi muammolarni hal qilsa, boks ham ular safiga qo‘shilishi mumkin.

Ma’lum qilinishicha, Los-Anjelesdagi o‘yinlar dasturiga 2024 yilda Parij Olimpiadasida debyut qilinadigan breyk kiritilmadi.

Eslatib o‘tamiz, Los-Anjelesda o‘tadigan Olimpiada o‘yinlari 2028 yilning 14-30 iyul kunlari bo‘lib o‘tadi.

Avvalroq, Xalqaro olimpiya qo‘mitasi (XOQ) Rossiya olimpiya qo‘mitasinining faoliyatini to‘xtatgani haqida xabar berilgan edi.