Odam savdosi bilan shug‘ullangan ayol Turkiyada ushlandi

Turkiyada xalqaro qidiruvda bo‘lgan O‘zbekiston fuqarosi M.X. ushlanib, belgilangan tartibda O‘zbekistonga qaytarildi. Bu haqda O‘zbekiston Respublikasining Istanbul shahridagi Bosh konsulxonasi xabar berdi.

Qayd etilishicha, M.X. Jinoyat kodeksining 135-moddasi (odam savdosi) hamda 223-moddasi (qonunga xilof ravishda chet elga chiqish)da nazarda tutilgan jinoyatlarni sodir etganlikda ayblanib, xalqaro qidiruvga berilgan.

Tergov materiallariga ko‘ra, u boshqa shaxslar bilan oldindan til biriktirib, fuqarolarni aldash yo‘li bilan Qozog‘iston orqali Tailand va Turkiyaga olib chiqib, u yerda fohishalik bilan shug‘ullanishga jalb qilganlikda ayblanmoqda.

O‘zbekiston va Turkiya huquqni muhofaza qiluvchi organlarining hamkorlikdagi tezkor tadbirlari natijasida M.X. ning turgan joyi aniqlangan. Shundan so‘ng, u qo‘lga olinib, O‘zbekistonga qaytarilgan.

Eslatib o‘tamiz, avvalroq uzoq yillardan buyon xalqaro qidiruvda bo‘lgan ikki nafar O‘zbekiston fuqarosi Turkiyada aniqlandi va qo‘lga olingani haqida xabar berilgan edi.