Одам савдоси билан шуғулланган аёл Туркияда ушланди

Туркияда халқаро қидирувда бўлган Ўзбекистон фуқароси М.Х. ушланиб, белгиланган тартибда Ўзбекистонга қайтарилди. Бу ҳақда Ўзбекистон Республикасининг Истанбул шаҳридаги Бош консулхонаси хабар берди.

Қайд этилишича, М.Х. Жиноят кодексининг 135-моддаси (одам савдоси) ҳамда 223-моддаси (қонунга хилоф равишда чет элга чиқиш)да назарда тутилган жиноятларни содир этганликда айбланиб, халқаро қидирувга берилган.

Тергов материалларига кўра, у бошқа шахслар билан олдиндан тил бириктириб, фуқароларни алдаш йўли билан Қозоғистон орқали Таиланд ва Туркияга олиб чиқиб, у ерда фоҳишалик билан шуғулланишга жалб қилганликда айбланмоқда.

Ўзбекистон ва Туркия ҳуқуқни муҳофаза қилувчи органларининг ҳамкорликдаги тезкор тадбирлари натижасида М.Х. нинг турган жойи аниқланган. Шундан сўнг, у қўлга олиниб, Ўзбекистонга қайтарилган.

Эслатиб ўтамиз, аввалроқ узоқ йиллардан буён халқаро қидирувда бўлган икки нафар Ўзбекистон фуқароси Туркияда аниқланди ва қўлга олингани ҳақида хабар берилган эди.