OCHL. “Paxtakor” safarda mag‘lubiyatdan qutilib qoldi

Bugun, 7 noyabr kuni futbol bo‘yicha Osiyo Chempionlar ligasi (OCHL) guruh bosqichining 4-tur o‘yinlari bo‘lib o‘tdi. Tur doirasida Toshkentning “Paxtakor” klubi safarda Turkmanistonning “Ahal” jamoasi bilan bahs olib borib, 1:1 hisobidagi durang qayd etdi.

“Ashxobod” stadionida bo‘lib o‘tgan o‘yinning birinchi bo‘limida hisob ochilmadi. Ikkinchi taymning 68-daqiqasida Odil Hamrobekov keraksiz vaqtda raqibga nisbatan juda qo‘pol o‘ynab, qizil kartochka oldi va “Paxtakor”ni qiyin vaziyatda qoldirdi. 

81-daqiqada esa mezbon jamoa vakili Alibek Abdurahmonov 10 kishi bo‘lib qolgan “sherlar” darvozasini ishg‘ol qilib, hisobni ochdi. O‘zbekiston jamoasi sharafini himoya qilayotgan Hojimat Erkinov 90+5-daqiqada muvozanatni tikladi.

Shu tariqa “Paxtakor” naqd bo‘lib turgan mag‘lubiyatdan qutilib qoldi va durang natija bilan qanoatlandi. 

Ma’lumot uchun, “Paxtakor” 4 ochko bilan guruhda 2-o‘rinda bormoqda. “Ahal”da ham 4 ochko mavjud, biroq klub 3-pog‘onadan joy olgan.

Eslatib o‘tamiz, kecha, 6 noyabr kuni Olmaliqning OKMK klubi safarda Eronning “Sepaxon” jamoasi bilan bahs olib borib, yirik 9:0 hisobida imkoniyatni boy bergan edi. 

Shuningdek, Qarshining “Nasaf” jamoasi o‘z uyida BAAning “Sharja” klubini qabul qilib, 1:1 ko‘rinishidagi durang natijaga erishdi. Namanganning “Navbahor” klubi esa mehmonda Eronning “Nassaji Mozandaron” jamoasiga qarshi bahs olib borib, 1:3 ko‘rinishidagi hisob bilan g‘alaba qozongandi.