Norboyeva Nyu-Yorkda Shveysariya Prezidenti bilan muzokara o‘tkazdi

Senat raisi Tanzila Norboyeva boshchiligidagi O‘zbekiston delegatsiyasi BMT Ayollar holati bo‘yicha komissiyasining 68-sessiyasida ishtirok etish uchun Nyu-York shahrida bo‘lib turibdi. Bu haqda Senat axborot xizmati xabar berdi.

Tashrif doirasida Norboyeva Shveysariya konfederatsiyasi Prezidenti Viola Amerd bilan uchrashuv o‘tkazgan.

Unda O‘zbekiston va Shveysariya hamkorligini izchil kengaytirish, shu jumladan, siyosiy muloqotni rivojlantirish, savdo-iqtisodiy, sarmoyaviy va texnologik sohalarda qo‘shma loyihalarni amalga oshirish masalalari muhokama qilingan. 

"Ayni paytda Shveysariya bilan avtomobilsozlik, to‘qimachilik, farmatsevtika, oziq-ovqat sanoati, chorvachilik, infratuzilma sohalarida 19 ta qo‘shma loyiha amalga oshirilmoqda. Uchrashuv davomida mazkur ko‘rsatkichni bir necha barobar oshirish uchun ikkala davlatda ham katta salohiyat va keng imkoniyatlar mavjudligi ta’kidlandi.

O‘zaro munosabatlarda parlamentlararo aloqalarning muhimligidan kelib chiqib, mazkur yo‘nalishdagi hamkorlik istiqbollari ham ko‘rib chiqildi. Xususan, ixtisoslashtirilgan qo‘mitalar darajasida aloqalarni faollashtirish, ikki davlat parlamentlarida do‘stlik guruhlarini tashkil etish yuzasidan fikr almashildi", deyiladi xabarda.

Shuningdek, uchrashuv davomida qator sohalarda hamkorlikni rivojlantirish yuzasidan amaliy takliflar ham ilgari surildi. Xususan, gender tenglik sohasida hamkorlikni rivojlantirish, mazkur yo‘nalishda o‘zaro tajriba almashish muhimligi qayd etilgan.

Orol dengizi mintaqasidagi vaziyatni yaxshilash yuzasidan ijtimoiy ahamiyatga molik dasturlarni amalga oshirishda moliyaviy va texnik hamkorlikni kengaytirish masalalari ham tomonlarning diqqat markazida bo‘lgan.