Neymarsiz “Al-Hilol” “Navbahor”dan ustun keldi, “Paxtakor” esa muhim g‘alabaga erishdi

Kecha, 28 noyabr kuni futbol bo‘yicha Osiyo Chempionlar ligasining (OCHL) 5-tur o‘yinlari nihoyasiga yetdi. Namanganda “Navbahor” Saudiya Arabistonining “Al-Hilol” klubini qabul qilgan bo‘lsa, Toshkentning “Paxtakor” jamoasi BAAda “Al-Ayn” bilan kuch sinashdi.

Samvel Babayan shogirdlari Neymarsiz O‘zbekistonga kelgan Saudiya klubiga 2:0 hisobida imkoniyatni boy berdi. Mehmonlardan gollarga 68-daqiqada Malkom va 85-daqiqada Al Dosari mualliflik qildi. 

Maksim Shatskix murabbiyligidagi “Paxtakor” esa muhim pallada g‘alabaga erishdi. Safarda o‘z guruhi peshqadami bilan kuch sinashgan Toshkent klubi 3:1 hisobida raqiblaridan ustun keldi. “Paxtakor” jamoasi safida gollarga Hojimat Erkinov va Dragan Cheran mualliflik qildi. BAA vakillarining golini esa Muhammad Xalfan kiritdi.

Shunday qilib, 5 ta turdan keyin “Navbahor” “D” guruhida 10 ochko bilan 2-o‘rinni egallaydigan bo‘ldi. Mazkur guruhda 1-o‘rinni “Al-Hilol” muddatidan oldin o‘zi uchun kafolatlab qo‘ydi. “Paxtakor” esa 7 ochko bilan “A” guruhida 2-o‘ringa ko‘tarilib oldi. “Al-Ayn” esa 12 ochko bilan kvartet peshqadamligini naqd qildi. Endi “sherlar” guruhdan chiqishi uchun so‘nggi turda g‘alaba qozonishi bilan birgalikda “Sharja”,“Al Sadd” va “Persepolis”ning ochko yo‘qotishini kutishga majbur bo‘ladi.