Navoiyda Qizil kitobga kiritilgan qushlar ovlangani aniqlandi

Navoiy viloyatida Qizil kitobga kiritilgan “Zarafshon qirg‘ovul”lari ovlangani aniqlandi. Bu haqda O‘zbekiston Respublikasi ekologiya va atrof muhitni muhofaza qilish davlat qo‘mitasi ma’lum qildi.

Navoiy viloyati Ekologiya atrof-muhitni muhofaza qilish sohasidagi Nazorat bo‘yicha inspeksiya hamda Bioxilma-xillik va muhofaza etiladigan tabiiy hududlar masalalari bo‘limi xodimlari tomonidan o‘tkazilgan reydda Buxoro viloyati Vobkent tumani “Uzbakom” MFYda yashovchi fuqaro A.A. tomonidan Qizitepa tumani “O‘rtacho‘l” massivi hududida ov yo‘llanmasi asosida 2 dona yovvoyi quyon hamda noqonuniy ravishda 3 (uch) dona O‘zbekiston Respublikasi Qizil kitobiga kiritilgan “Zarafshon qirg‘ovul”larini ovlaganligi aniqlangan.

Ushbu holat yuzasidan fuqaroga nisbatan O‘zbekiston Respublikasi MJtKning 94-moddasi 1-qismi bilan ma’muriy bayonnoma rasmiylashtirilgan. Tegishli hujjatlar Ma’muriy sud organlariga yuborilib, tabiatga 6 690 000 so‘m zarar yetkazilgani belgilangan.