NATO vaziyat keskinlashsa, Ukrainaga qo‘shin kiritadimi?

NATO davlatlari Ukrainaga qo‘shin kiritmaydi. Bu haqda NATO bosh kotibi Yens Stoltenberg ma’lum qildi.

“NATO Ukrainada jangovar qismlarni joylashtirmaydi”, degan u CNN telekanaliga bergan intervyusida.

Xavfsizlik kafolatlari bo‘yicha muzokaralar haqida gapirar ekan, Stoltenberg blok Rossiya bilan “qurol nazorati, qurolsizlanish, harbiy faoliyatning shaffofligi, xavflarni kamaytirish mexanizmlari va Yevropa xavfsizligi bilan bog‘liq boshqa masalalarni” muhokama qilishga tayyorligini ta’kidlagan.

“Biroq, NATO asosiy tamoyillar bo‘yicha murosaga kelmaydi”, deya qo‘shimcha qilgan u.

Alyans bosh kotibi Rossiyaning xavfsizlik kafolatlari bo‘yicha takliflariga AQSH bilan parallel ravishda javob yuborishini aytgan.

“Biz NATOda takliflar bo‘yicha ishlarni yakunlaymiz, yozma hujjatni shu hafta oxirida ularga yuboramiz”, deya tushuntirgan u.

AQSH va NATO bilan muzokaralar

O‘tgan yil oxirida Moskva xavfsizlik kafolatlari bo‘yicha hujjatlar loyihalarini Bryussel va Vashingtonga topshirgan edi. Kreml blokning postsovet davlatlari bilan harbiy hamkorligini to‘xtatish, ular hududida bazalar yaratishdan bosh tortish, Rossiya chegarasi yaqinida zarba beruvchi qurollarni joylashtirishni cheklash, Amerika yadroviy qurollarini Yevropadan olib chiqish va NATOning sharqda kengaymasligini kafolatlashni talab qilmoqda.

Joriy yil yanvar oyida Rossiya, AQSH va NATO o‘rtasida xavfsizlik kafolatlari bo‘yicha bir qator maslahatlashuvlar bo‘lib o‘tdi: 9-10 yanvar kunlari bu masala Jenevada Amerika tomoni bilan uchrashuvlarda, 12 yanvarda Rossiya-NATO kengashi yig‘ilishida va 13 yanvar kuni YeXHT maydonchasida muhokama qilindi. Moskva AQSH va NATOdan javob kutmoqda.

Avvalroq, Pentagon AQSH Prezidenti Jo Baydenga Ukraina atrofida vaziyat yomonlashsa, Sharqiy Yevropa davlatlariga guruh soni o‘n baravar oshishi mumkin bo‘lgan mingdan besh minggacha qo‘shin yuborishni taklif qilgani aytilgandi. Bayden bir hafta ichida bu bo‘yicha qaror qabul qilishi kutilmoqda.

So‘nggi paytlarda G‘arb mamlakatlarida, shuningdek, Kiyevda Rossiyaning Ukrainaga bostirib kirishi mumkinligi haqida bayonotlar paydo bo‘ldi. Rossiya Federatsiyasi Prezidentining Matbuot kotibi Dmitriy Peskov bunday ma’lumotni bo‘sh va asossiz keskinlikning kuchayishi deb atadi. Uning ta’kidlashicha, Rossiya hech kimga tahdid solmaydi. Shu bilan birga, Peskov bunday bayonotlarni oqlash uchun provokatsiyalar bo‘lishi mumkinligini inkor etmadi va Ukraina janubi-sharqidagi inqirozni kuch bilan hal qilishga urinishlar eng og‘ir oqibatlarga olib kelishidan ogohlantirdi.