NATO rahbari Rossiyani ochiq urush olib borishda aybladi

NATO Bosh kotibi Mark Ryutte Rossiya uzoq vaqtdan beri NATO davlatlariga qarshi yashirin emas, balki ochiq urush olib borayotganini aytdi. Bu haqda “Bild” xabar berdi.

Mark Ryutte Bryuselda xavfsizlik mutaxassislari oldida nutq so‘zlar ekan, “yondashuvni o‘zgartirish” va “harbiy tafakkur”ga o‘tish zarurligini ta’kidladi, chunki bu Yevropada dronlar yordamida amalga oshirilishi mumkin bo‘lgan hujumlarga tayyor turish imkonini beradi.

Amerikaning OBSE’dagi delegatsiyasi taqdim etgan hisobotga ko‘ra, Ukrainadagi urush boshlanganidan buyon Rossiya NATO mamlakatlari hududida taxminan 150 ta hujumni amalga oshirgan. Bularga temiryo‘llar, kasalxonalar, aviatsiyadagi GPS tizimlari va suv ta’minoti ob’ektlariga qilingan kiberhujumlar kiradi. Hisobotda, shuningdek, xakerlik, sabotaj, harbiy ob’ektlar va suvosti infratuzilmasiga tahdidlar haqida ham ma’lumot berilgan.

“Maxsus e’tibor tanqidiy infratuzilma hujumlariga qaratilgan. Masalan, 2024 yilda Ruminiyadagi yirik kasalxonalar va AQSHdagi dorixonalar xaker hujumlari sababli ishlamay qolgan, Yevropada esa GPS signalining uzilishlari qayd etilgan. Rossiya, shuningdek, Boltiq dengizidagi suvosti kabellariga sabotaj qilishda gumon qilinmoqda, bu esa aloqa va ma’lumot uzatish tizimlariga ta’sir ko‘rsatgan”, deyiladi xabarda.

Kiberhujumlardan tashqari, hisobotda jismoniy zo‘ravonlik va suiqasdlar haqida ham so‘z yuritilgan. Italiyada Mudofaa vazirini o‘ldirishga mo‘ljallangan fitna fosh etilgan, Germaniya va AQSHda esa mudofaa sanoati bilan bog‘liq kompaniyalar rahbarlariga hujum qilish rejalari aniqlangan. Shuningdek, Rossiya Yevropa Ittifoqi davlatlari chegaralarida notinchlik yaratish uchun migratsiya inqirozidan foydalanganlikda ayblanmoqda. Hujjatda Rossiya propagandasi va saylovlarga aralashish roliga ham alohida urg‘u berilgan.

Eslatib o‘tamiz, avvalroq NATO Bosh kotibi Mark Ryutte Rossiya va Eron Suriyaning hokimiyatdan ag‘darilgan prezidenti Bashar Asad jinoyatlariga sherik ekani va rejimning qulashi ushbu ikki davlatning “ishonchsiz sheriklar” ekanini ko‘rsatganini aytgandi.