Narkotik bilan qo‘lga tushgan Navai Qozog‘istondan haydaldi

Qozog‘iston chegarasida narkotik bilan ushlangan reper Navai’ga nisbatan jinoyat ishi tugatildi. Bu haqda advokat Sergey Joringa tayanib, “Super” xabar berdi.

Qayd etilishicha, bugun, 20 oktyabr kuni Navai’ga nisbatan ochilgan ish reabilitatsiya qilinmaydigan asoslarga ko‘ra tugatilgan. Shuningdek, reper Qozog‘istondan deportatsiya qilingan.

Advokat Sergey Jorin nashrga bergan intervyusida Navai (haqiqiy ismi Navai Bakirov) qo‘lga olingan vaziyatda ijobiy yakun bo‘lganini ta’kidlagan. Uning so‘zlariga ko‘ra, musiqachiga Qozog‘istonda hech qanday jazo xavf solmaydi.

“Rossiyada javobgarlikka tortilishi mumkinligiga kelsak, Bakirovga bu yerda albatta nimadir xavf soladi deyishga hech qanday asos ko‘rmayapman. Qozog‘istonda jinoyat ishining tugatilishining o‘zi Rossiyada yangi ish qo‘zg‘atilishiga olib kelmaydi”, deydi Jorin.

Uning qo‘shimcha qilishicha, qonunga ko‘ra (Rossiya Jinoyat kodeksining 12-moddasi), rossiyalik chet elda sodir etgan jinoyati uchun jinoiy javobgarlikka faqat xorijiy sud ushbu ish bo‘yicha hali o‘z qarorini chiqarmagan bo‘lsagina tortilishi mumkin. Shu bilan birga, boshqa mamlakatda ishning tugatilgani fakt sifatida yetarli emas: Rossiyada ish qo‘zg‘atish uchun alohida asoslar va dalillar kerak bo‘ladi.

“Mening fikrimcha, ma’lum holatlarda voqealarning bunday rivojlanish ehtimoli juda past”, deydi huquqshunos.

Sergey Jorin, shuningdek, agar reper Qozog‘istonga qaytishni xohlasa, qanday cheklovlarga duch kelishi mumkinligini ham aytgan. Qozog‘iston Respublikasining “Aholi migratsiyasi to‘g‘risida”gi qonunining 48-moddasiga ko‘ra, agar sud chet ellikni mamlakatdan chiqarib yuborish haqida qaror chiqargan bo‘lsa, unga besh yil muddatga kirish taqiqlanadi. Bu muddat chiqarib yuborish to‘g‘risidagi qaror ijro etilgan kundan boshlab hisoblanadi.

“Shu sababli, agar Bakirovga nisbatan aynan chiqarib yuborish bo‘yicha sud qarori qabul qilingan bo‘lsa, yaqin besh yil ichida u Qozog‘istonga, jumladan, konsertlar o‘tkazish uchun ham tashrif buyura olmaydi”, deydi Jorin.

Eslatib o‘tamiz, 14 oktyabr kuni Navai muxlislari uning Ostonada o‘tkazilishi rejalashtirilgan konsertiga tusha olmasligi ma’lum bo‘lgan edi. Tashkilotchilar konsert bekor qilinganini e’lon qilgan.

O‘sha kuni Jambil viloyati Ichki ishlar boshqarmasi Navai giyohvandlik moddalari kontrabandasida gumonlanib qo‘lga olinganini xabar qildi. U vaqtincha saqlash hibsxonasiga joylashtirildi.

Shu bilan birga, reperning direktori Rauf Gusanov artistning qo‘lga olinishiga izoh berishdan bosh tortdi, uning onasi esa vaziyatni “tuhmat” deb atadi va u tez orada qo‘yib yuborilishiga ishonch bildirdi.

Bu fonda Qirg‘izistonda tekshiruv boshlandi. Cheklov xizmati musiqachining chegaradan giyohvandlik moddalari bilan qanday o‘tib ketganini aniqlamoqda, aybdorlar jazolanishi mumkin.

15 oktyabr kuni artistni hibsga olishga sanksiya berildi. Uning advokati Rena Kerimova himoya tomoni unga jarima tayinlanishiga erishishga harakat qilishini aytgan edi.