Nyu-York yaqinida so‘nggi 40 yildagi eng kuchli zilzila sodir bo‘ldi

Kecha, 5 aprel kuni AQSHning sharqiy qirg‘og‘ida Nyu-Jersi shtatida bir kunda ikkita zilzila sodir bo‘ldi. Bu haqda AQSH Milliy Geologiya xizmati (USGS) ma’lum qildi. 

Mahalliy vaqt bilan taxminan 10:23 da sodir bo‘lgan birinchi silkinishlar magnitudasi taxminan 4.8 ni tashkil qilgan. Zilzila Filadelfiyadan Bostongacha bo‘lgan bir qancha qirg‘oq shaharlarida, jumladan Nyu-Yorkda ham sezilgan.

BMT Xavfsizlik Kengashining navbatdagi yig‘ilishi ishtirokchilari ham yer silkinishlarini his qilgan, buni tashkilotning Nyu-Yorkdagi shtab-kvartirasidan olingan videotasvirdan ko‘rish mumkin. Biroq, binoni evakuatsiya qilishning hojati yo‘q edi va yig‘ilishning o‘zi bir necha soniyaga to‘xtatildi.

Birinchi zilziladan so‘ng mintaqada 2 ballgacha bo‘lgan bir qancha yer silkinishlari ham sodir bo‘ldi va mahalliy vaqt bilan soat 17:59 da 4,0 magnitudali yangi silkinishlar qayd etildi. USGS ma’lumotlariga ko‘ra, zilzila manbai Nyu-Jersi shtatidagi Uaytxaus qishlog‘i yaqinida, 9,4 km chuqurlikda bo‘lgan.
Nyu-Jersi va Nyu-Yorkdagi aeroportlar kun davomida faoliyatini to‘xtatdi. Biroq mahalliy hokimiyatning dastlabki ma’lumotlariga ko‘ra, yer silkinishlari infratuzilmaga jiddiy zarar yetkazmagan. Hodisa oqibatida qurbonlar haqida ham ma’lumot yo‘q.

Nyu-York meri Erik Adams yaqin kunlarda mintaqada 3 magnitudali yana silkinishlar kuzatilishi mumkinligini ta’kidladi.

Ma’lumot uchun, Qo‘shma Shtatlarning sharqiy sohillarida zilzilalar nisbatan kam uchraydigan hodisa, o‘tgan yili Nyu-York shtatida 3,8 magnitudali zilzila sodir bo‘lgan edi. Biroq, so‘nggi silkinishlar 1983 yilda Nyu-York shimolidagi Nyukomb shahrida 5,1 magnitudali zilzila sodir bo‘lganidan beri mintaqada sodir bo‘lgan eng kuchli silkinishlar edi. So‘nggi o‘n yilliklarda AQSHning sharqiy qirg‘og‘ida sodir bo‘lgan eng kuchli zilzila 2011 yilda Virjiniyada kuzatilgan silkinishlar bo‘ldi - uning magnitudasi 5,9 ga yetdi.

Eslatib o‘tamiz, oldinroq Tayvanda magnitudasi kamida 7,2 ni tashkil etgan zilzila yuz bergan. Mahalliy hukumat ma’lumotlariga ko‘ra, tabiiy ofat kamida to‘qqiz kishining hayotiga zomin bo‘lgan, 1000 ga yaqin aholi jarohatlangan.