Musulmonlarni qirgan “Bosniya qassobi” vafot etdi

Bugun, 27 avgust kuni Serb respublikasi armiyasining sobiq qo‘mondoni Ratko Mladich 84 yoshida vafot etdi. Bu haqda Serbiya televideniyesi xabar berdi.

Ma’lumot uchun, Ratko Mladich – 1992-1995 yillardagi Bosniya urushi davrida Serb Respublikasi armiyasiga bosh qo‘mondonlik qilgan sobiq Yugoslaviya harbiy xizmatchisi. U 1990-yillardagi Bolqon fojialarining eng qonli va qarama-qarshiliklarga boy figuralaridan biri sifatida tarixga kirgan. Mladich rahbarligi ostidagi kuchlar 1992-1996 yillarda Bosniya poytaxti Sarayevoni shafqatsizlarcha qamal qilib, shaharni uzluksiz o‘qqa tutishi oqibatida 10 mingdan ortiq tinch aholi halok bo‘lgan. Uning nomi bilan bog‘liq eng mudhish fojia esa 1995 yilda sodir etilgan bo‘lib, Mladich qo‘shinlari BMT tomonidan “xavfsiz hudud” deb e’lon qilingan Srebrenitsa shahriga bostirib kirib, 8000 dan ortiq musulmon erkaklar va o‘smirlarni tizimli ravishda qirib tashlagan. Bu Ikkinchi jahon urushidan so‘ng Yevropada sodir etilgan eng yirik qirg‘in va genotsid sifatida tan olingan. Urush yakunlangach, Gaaga tribunali tomonidan harbiy jinoyatchi deb e’lon qilingan Mladich Serbiyada qariyb 16 yil yashirinib yurgan va 2011 yildagina qo‘lga olinib, Gaagaga topshirilgan. 2017 yilda BMT Xalqaro tribunali uni Srebrenitsadagi genotsid, insoniyatga qarshi jinoyatlar va BMT tinchlikparvar kuchlari xodimlarini garovga olgani uchun umrbod ozodlikdan mahrum qilishga hukm etgan, bu qaror 2021 yilda o‘z kuchida qoldirilgan. Ratko Mladich bir tomondan xalqaro hamjamiyat va boshnyaklar tomonidan “Bosniya qassobi” hamda harbiy jinoyatchi sifatida qolgan bo‘lsa, boshqa tomondan ayrim serb millatchilari orasida qahramon sifatida ko‘rilgan.