Muxolifat Pashinyanning Qorabog‘da o‘lganlarni ziyorat qilishiga qarshi chiqdi

Huquq-tartibot idoralari xodimlari va Bosh vazir Nikol Pashinyanning muxoliflari o‘rtasidagi janjal bugun, 19 dekabr kuni tushdan keyin boshlangan. Bu paytda motam marshini o‘tkazgan Bosh vazir Tog‘li Qorabog‘dagi jang paytida halok bo‘lganlar xotirasini yod etish uchun Yerablur yodgorlik majmuasiga yaqinlashgan edi.

“Nikol xoin, Nikol Yerablurga yaqinlashmasligi kerak”, deya baqirgan namoyishchilar.

Shu paytda politsiya himoya qobig‘i yaratgan va Bosh vazir qo‘riqchilar yordamida binoga kirgan.

Mahalliy telekanallar efirga uzatayotgan paytda Pashinyan yodgorlik majmuasiga xavfsizlik bilan kirishga muvaffaq bo‘lgan. U vafot etgan askarning qabri oldida tiz cho‘kib, gullar qo‘ygan. Bosh vazir, shuningdek, u yerda bo‘lgan qurbonlarning bir necha qarindoshlariga hamdardlik bildirgan. Shundan so‘ng, Pashinyan mashinaga o‘tirib, qo‘riqchilar qurshovida yodgorlik majmuasi hududidan chiqib ketgan.

Eslatib o‘tamiz, avvalroq Armanistonda Qorabog‘da halok bo‘lganlar uchun motam yurishi boshlangani xabar qilingandi.